Kërkesë e PREK-ut, për ta ndihmuar PriFest-in

Shoqata e Producentëve të Filmit të Kosovës (PREK), i është drejtuar me një letër institucioneve të vendit, për ta ndihmuar financiarisht festivalin ndërkombëtar të filmit, PriFest! Letrën e tyre mund ta lexoni të plotë më poshtë.

“Ju drejtohemi në emër të PREK – Shoqatës së Producentëvë të Filmit të Kosovës, për të kërkuar mbështetje nga institucioni juaj për PriFest – Prishtina International Film Festival, gjegjësisht platformën e industrisë filmike të saj PriFORUM – Prishtina Film FORUM.

Arsyeja për këtë kërkesë/lutje tonën është sepse PriFest është një ndër institucionet më të rëndësishëm kulturës, dhe jo vetëm filmike në Kosovë, që kontribuon përveç në ngritjen kulturore e kinematografike të audiencës sonë, por edhe në zhvillimin dhe ngritjen e industrisë filmike vendore.

Përveç shfaqjes dhe promovimit të filmave vendorë, promovimit të tyre brenda dhe jashtë vendit, përmes platformës zhvillimore rajonale të koproduksionit PriFORUM, kontribuon drejtpërdrejtë në avancimin e producentëve, shtëpive filmike, aktorëve dhe filmbërësve vendor të lëmenjve të ndryshëm të industrisë filmike të Kosovës. Dhe, atë përmes programeve të trajnimit, rrjetëzimit, garës së projekteve dhe pjesës së konferencës dhe tryezave te rrumbullakëta.

Programet e PriFORUM si Best Pitch Competition, ku garojnë projektet në fazën e hershme të paraprodhimit, pra në fazën e skenarit, ku garuesit përveç trajnimit për prezantim para jurisë dhe audiencës, fitojmë mundësinë e fitimit të çmimeve te ndryshme që ndihmojnë drejtpërdrejtë në zhvillimin e atyre projekteve. Ato çmime janë edhe financiare, por edhe në shërbime të ndryshme, si ato të post-produksionit që janë një ndihmesë e madhe për projektet në fazën e hershme. Përveç të lartpërmendurave, projektet prezantohen para një numri të madh të producentëve të huaj që mund të jenë bashkëprodhues eventual të tyre në të ardhmen, gjë që ka ndodhur me shumë projekte të Kosovës. Për shembull, vitin e kaluar projekti ‘Zgjoi’ ka fituar çmimin e post-produksionit në vlerë prej 80,000 eurove në shërbime, që i bën të mundur të finalizoje filmin me shërbimet e montazhit.

Përveç kësaj, PriFest dhe PriFORUM çdo vit organizojnë që një projekt filmik i Kosovës të prezantohet vecmas si Case Study, para mysafirëve të festivalit dhe pjestarëvë të industrisë nga rajoni dhe Evropa. Projektet filmike, tani të suksesshme, si ‘Martesa’, ‘Tri dritare dhe nje varje’ janë prezantuar në PriFORUM në fazë të hershme.

Dhe ky është vetëm njëri nga programet e shumta që i ofron ky festival dhe platforma e saj zhvillimore. Programet si Script Developtment (Zhvillim skenari), ku ekspertë me renome ndërkombëtare mbajnë punëtori me projektet në fazën e skenarit janë më se të dobishme për industrinë tonë. E para se janë gratis (e që kushton mjaft po të paguhej), dhe e dyta mbahet në Prishtinë, ku qasja e kineastëve tanë është e lehtë, gjithmonë duke marrë parasysh pengesat për udhëtim jashtë vendit, shkaku i vizave dhe kostos.

Jo më pak i rëndësishëm është edhe programi Prishtina Rendezvous, ku projektet filmike takohen drejtpërdrejtë me përfaqësues të kompanive të shumta evropiane të distribuimit dhe shitjes së filmit. Kjo është një ndër pjesët më të vështira, dhe më të nevojshme për industrinë tonë në këtë moment. Gjitha ato kompani të distribuimit dhe shitjes PriFest dhe PriFORUM i sjellin në Prishtinë, ndërsa për t’i takuar të njëjtat në festivalet e mëdha nëpër Evropë, është tepër e vështirë, gjë që për filmbërësit tanë është një lehtësim dhe benefit i madh.

Pastaj për të vazhduar me programin Work in Progress, ku kineastët tanë kanë mundësi të shfaqin pjesë të flmave të tyre të xhiruar, para distributorëve, shitësve dhe programerëve të festivaleve të ndryshme me renome botërore. Kjo lehtëson procesin e shitjes dhe plasimit të filmave tanë në festivale, sepse rruga ‘normale” e aplikimeve dhe tentimit të prezantimeve të filmave tanë vështirësohet shumë kur je në konkurrencë me mija filma nga gjithë bota. Kështu, ne kineastët e Kosovës, në PriFest dhe PriFORUM gjejmë mundësinë më të mirë, për të prezantuar dhe takuar këta nejrëz nga industria e rajonit dhe Evropës.

Dhe në fund, jo më pak i rëndësishëm, programi Kosova’s Rising Stars, prezantimi i 10 aktorëve e rinj e perspektiv të Kosovës, prezantim dhe promovim i tyre jo vetëm gjatë festivalit, por edhe pas tij. Një mundësi shumë e mirë që të shfrytëzohet në maksimum për mundësi ko-produksioni me shtetet tjera, një ndër asetet e mëdha të industrisë së filmit të Kosovës: aktorët.

Mbi të gjitha, mundësia e takimit, njoftimit dhe rrjetëzimit është pikënisja e çdo bashkëpunimi që sjell atë finalen: bashkëprodhimin e filmave të Kosovës me shtetet tjera, promovimi i industrisë sonë dhe përfundimisht: zhvillimin e saj.

Krejt në fund, duam të theksojmë se industria e filmit është një potencial i madh për krijimin e vendeve të punës, sidomos për pozita të ndryshme kreative dhe teknike që i kërkon filmi e që i ka Kosova dhe mund t’i zhvillon edhe më shumë.

Siç na kanë informuar na PriFest, ata sivjet do të organizojnë edhe promovimin e shtëpive filmike të Kosovës, mundësive të tyre teknike për xhirim dhe post-produksion si dhe promovimin e lokacioneve për xhirim në Kosovë për projektet e huaja filmike.

Të gjitha këto na bëjnë që ne producentët filmik të Kosovës, të kërkojmë nga ju që brenda mundësive që keni, të mbështetni këtë festival dhe institucion të kinematografisë, në të mirë të zhvillimit të përgjithshëm të industrisë së filmit të Kosovës” (sic.). /Telegrafi/