Toni Braxton ka marrë pjesë ne emisionin Loose WomenITV1 për ta promovuar këngën e re me titull “Long As I Live’.

Rikthimi i saj në këtë emision ka ardhur pas dy dekadash, kur e kishte promovuar hitin e paharrueshëm, “Unbreak My Heart”.

Ndërsa askush nuk mund të beson te se këngëtarja ishte 50-vjeçare, shumë nga të pranishmit mendoni se ajo është shumë më e re.

Karriera

Dukja e saj në emisionin Loose Women (Foto: YouTube/ITV1)

E lindur më 7 tetor 1967 në Maryland të SHBA-ve, Toni ka qenë aktive në botën e muzikës që nga viti 1989. Karriera e saj muzikore nisi në një grup familjar, në të cilin ishte së bashku me motrat e saj, ndërsa bendi quhej “The Braxtons”.

Pasi tërhoqi vëmendjen e Antonio ‘LA’ Reid’s dhe Kenneth ‘Babyface’ Edmonds’, këngëtarja e nisi karrierën solo dhe në vitin 1993 debutoi me albumin e titulluar “Toni Braxton”. Ai album i fitoi tri çmime Grammy.

Albumi i saj i dytë “Secrets” (1996) që përmban hite, si “Unbreak My Heart” dhe “You’re Making’ Me High” fitoi edhe dy Grammy të tjerë, ndërsa një çmim Grammy, këngëtarja e fitoi me albumin e tretë The Heat (2000) që përmbante një tjetër hit të sajin, “He Wasn’t Man Enough”.

Hiti i saj, “Unbreak My Heart”, kryesoi top-listat në shumë vende dhe e bëri atë të popullarizuar në gjithë botën. Në vitet pasuese, ajo vazhdoi të ishte e suksesshme, ndërsa interesimi për jetën e saj, bëri që të niste një serial real televiziv (“Braxton Family Values”) që ndiqte përditshmërinë e familjes së këngëtares. Pos të qenit këngëtare, Braxton është edhe producente televizive.

Nga albumet tjera që i ka lansuar, përmendim edhe “More Than A Woman” (2002), “Libra” (2005) e “Pulse” (2010), si dhe albumi në duet me Babyface, “Love, Marriage & Divorce”, i cili i solli dy çmime tjera Grammy. Ndërkaq, karrierën 25-vjeçare në muzikë, do ta vazhdojë me albumin e nëntë me radhë.

Jeta private

(Foto: Getty Images)

Braxton u martua me muzikantin Keri Lewis në prill të vitit 2001 dhe po atë vit u bënë prindër të djalit Denim Cole Braxton-Lewis. Djali i tyre i dytë, Diezel Ky Braxton-Lewis, lindi në mars të vitit 2003.

Çifti u nda në vitin 2009, ndërsa shkurorëzimi u finalizua katër vite më pas. Ajo tash është në lidhje me reperin Birdman, me të cilin është fejuar para një jave.

Sëmundja

(Foto: Getty Images)

Në vitin 2007 ishin përhapur spekulime se Toni është diagnostikuar me kancer të gjirit, mirëpo në një intervistë për Access Hollywood, ajo kishte thënë se këto thashetheme janë të pavërteta dhe se ishte në gjendje shumë të mirë shëndetësore.

Megjithatë, një vit më pas iu hoq një tumor nga gjiri. Më pas, ishte shtrirë sërish në spital duke treguar se ishte diagnostikuar me anginë mikrovaskulare (sëmundje enëve të vogla të gjakut).

Në nëntor të vitit 2010, Toni kishte pranuar në CBS News se ishte diagnostikuar me lupus eritematoid sistemik, një sëmundje e rëndë kronike autoimuine.


Lupusi eritematoid sistemik që njihet shkurt si lupus, është një sëmundje autoimune, në të cilën sistemi imunitar i organizmit i sulmon gabimisht indet e shëndetshme në shumë pjesë të trupit. Simptomat dallojnë te njerëzit e ndryshëm dhe mund të jenë nga të lehtë deri në të rëndë. Simptomat më të shpeshta janë dhimbja dhe ënjtja e nyjave, ethet, dhimbja e gjoksit, humbja e flokëve, ulcerat në gojë, ënjtja e nyjave limfatike, ndjenja e lodhjes dhe skuqja e lëkurës më së shpeshti në fytyrë. Zakonisht ka periudha të sëmundjes dhe periudha të lehtësimit, kur simptomat janë më të lehta.


Edhe vëllai i Braxton është i diagnostikuar me këtë sëmundje, ndërsa axha i saj ka vdekur prej komplikimeve nga lupusi.

Gjatë serialit televiziv, “Braxton Family Values”, këngëtarja i ishte nënshtruar ndërhyrjes kirurgjike, ndërsa në disa raste ishte shtrirë në spital, për shkak të problemeve shëndetësore që lidhen me lupusin.

Rikthimi dhe pasuria

(Foto: Getty Images)

Braxton tash është e gatshme që ta ringjallë karrierën e saj me publikimin e albumit të nëntë me radhë që është caktuar të lansohet gjatë këtij viti

Pasuria e saj vlerësohet të jetë 10 milionë dollarë (tetë milionë euro). /Telegrafi/