Vedat Muriqi ka qenë protagonist në fitoren e rëndësishme të Fenerbahçes ndaj Konyasporit me rezultat 4-2, duke shënuar një gol dhe duke dhuruar një asistim.
Pas ndeshjes, sulmuesi kosovar u shpreh i lumtur për rikthimin e tij në këtë stadium dhe për mbështetjen që mori nga tifozët.
“Jam shumë i lumtur. Kanë kaluar gjashtë vjet. Të luaj në këtë fushë, para këtyre tifozëve dhe të dëgjoj tifozët e mrekullueshëm që brohorasin emrin tim është diçka e mrekullueshme. I falënderoj ata dhe të gjithë ata që më dhanë këtë mundësi”, tha Muriqi.
Ai theksoi rëndësinë e fitores pas humbjes në javën e parë të kampionatit.
“Humbja që pësuam në javën e parë ishte një tronditje për ne. Kjo javë ishte shumë e rëndësishme. Tani është ndeshja me Lyonin. Shpresojmë ta fitojmë dhe të vazhdojmë rrugën tonë”, deklaroi sulmuesi kosovar.
Fenerbahçe dhe Lyoni do të përballen në ndeshjen e kthimit të play-offit të Ligës së Kampionëve, pasi sfida e parë në Francë përfundoi 1-1.
Muriqi pret një ndeshje të vështirë në Stamboll, por beson fuqishëm te skuadra e tij.
“Do të jetë një ndeshje krejt e re. Ata do të jenë më agresivë dhe do të përpiqen të na frikësojnë, por ne kemi lojtarë shumë të talentuar. Nëse shënojmë një gol, në varësi të rrjedhës së ndeshjes, do ta kthejmë avantazhin. Jemi një ekip më i mirë se ata”, u shpreh Muriqi.
Ai nuk e fshehu dëshirën për ta ndihmuar Fenerbahçen të arrijë në fazën e Ligës së Kampionëve.
“Mendoj se do të marrim pjesë në Ligën e Kampionëve, të cilën e kemi dëshiruar me padurim. Mund të më mungojnë golat, por kur nënshkrova kontratën për herë të parë thashë se nuk do të shmangesha kurrë nga lufta. Kjo do të vazhdojë”, përfundoi Muriqi.
Fenerbahçe – Lyon do të luhet për një vend në fazën e Ligës së Kampionëve, me Muriqin që pritet të jetë një nga lojtarët kryesorë të skuadrës turke. /Telegrafi/
