A do t’ia heq administrata Trump “non gratën”, përgjigjet Sali Berisha

Ish-kryeministri dhe kryetari i Partisë Demokratike, Sali Berisha, ka komentuar fitoren e republikanit Donald Trump në zgjedhjet e fundit në Shtetet e Bashkuara.

I pyetur nëse kjo fitore mund të çojë në heqjen e sanksionit “non grata” të vendosur ndaj tij nga SHBA, Berisha theksoi se shpreson për një Amerikë që vlerëson parimet dhe jo një vend që mbështet, sipas tij, “narko-shtetin” e drejtuar nga kryeministri Edi Rama.

“Shpresa është tjetërkund. Do shikojmë një Amerikë të vlerave dhe jo një Amerikë të Dumanëve dhe të Edi Ramës që mbështet narko-shtetin. Një nga aktet më të rënda në historinë e marrëdhënieve mes dy vendeve është korruptimi i McGonigal nga Edi Rama. Një ditë para gjyqit në Shqipëri, sekretari i Shtetit u tha shqiptarëve se Edi Rama është i shkëlqyer, ndërkohë që të nesërmen kishte gjyqin në Washington. Kjo ishte një devijim madhor nga vlerat universale që popujt dhe njerëzit e lirë ndajnë,” deklaroi Berisha.

Në intervistën e tij në Euronews Albania me analistin Arion Sulo, Berisha u pyet nëse pret që të hiqet masa “non grata” ndaj tij.

“Unë do e prisja nga cilido që do zgjidhej, pasi ky ishte një grusht shteti. Në doktrinën politike, ajo që u bë ndaj opozitës shqiptare ishte një grusht shteti brenda shtetit në një vend partner,” përfundoi Berisha.