Qendërmbrojtësi i Romës, Roger Ibanez, mund të përfundojë duke luajtur për Italinë një ditë, pasi raportohet se trajneri i Azzurrëve, Roberto Mancini mendon të thërrasë brazilianin në kombëtare.

Nëse Mancini kontakton mbrojtësin e Giallorossëve, mund të fillojnë procedurat për marrjen e lejes për të veshur fanellën e Azzurrëve.

Ibanez ka tre pasaporta, pasi ka lindur në Brazil, është rritur në Uruguai dhe ka paraardhës nga Italia. Ai mori pasaportën italiane para se të mbërrinte në Atalanta në janar të 2019 dhe tani Mancini mendon të përfitojë nga situata.

22-vjeçari zbuloi se ëndrra e tij është të luajë për Brazilin, por pranoi se do ta merrte parasysh nëse Italia do të thërriste.

Ai do të donte t’i bashkohet emrave si Rafael Toloi, Jorginho dhe Emerson Palmieri, të cilët janë lojtarë të lindur në Brazil dhe tashmë luajnë me skuadrën e Italisë.

Sipas Il Corriere dello Sport, fjalët e tij nuk kaluan pa u vënë re nga FIGC dhe Mancini do të vlerësojë nëse Ibanez mund të jetë i dobishëm për Azzurrët para Kupës së Botës në Katar vitin e ardhshëm.

Mancini është përqendruar te Francesco Acerbi i Lazios, mbrojtësi i Interit Alessandro Bastoni dhe Toloi i Atalanta si alternativat ndaj dyshes së Juventusit Leonardo Bonucci dhe Giorgio Chiellini.

Por, rruga drejt Katarit është e gjatë dhe pasiguritë mbrojtëse u theksuan gjatë finaleve së Ligës së Kombeve të UEFA-s, kur Italia humbi 2-1 nga Spanja dhe më pas fitoi 2-1 ndaj Belgjikës. /Telegrafi/