Ish-sulmuesi i njohur kroat në luftë me vdekjen (Foto)

Disa vite më parë ai konsiderohej si një nga sulmuesit më të mirë në Bundesliga dhe një emër premtues për Kombëtaren e Kroacisë, por tashmë është i detyruar të luftojë me vdekjen.

Ish sulmuesi i Werder Bremenit, Ivan Klasnic është në një situatë kritike, pasi për të tretën herë trupi i tij ka nevojë për një veshkë.

Dy herët e para ishin familjarët që i dhuruan veshka, por tashmë i drejtohet opinionit publik për ndihmë pasi veshkat e tij nuk funksionojnë sërish dhe ditët e tij janë të numëruara.

Klasnic u diagnostikua me sëmundjen e rëndë që kishte prekur veshat e tij rreth 10 vjet më parë dhe që prej asaj periudhe, të afërmit i kanë dhuruar dy veshka. Ishte fillimisht i ati që ia dhuroi organin por veshka nuk funksionoi plotësisht në trupin e tij, ashtu si edhe organi i dhuruar nga vëllai i tij pak kohë më vonë.

“Po i përjetoj këto momente sikur të ishin të fundit në jetën time sepse jeta është përherë e varur në fije të perit. Gjithsesi duhet t’i dorëzohemi fatit tonë’, shprehet ish sulmuesi kroat në një intervistë të gjatë dhënë për gazetën “Bild”.

Aktualisht, 36-vjeçari është në pritje të një organi që mund të vijë nga një person që ka humbur jetën.

“Jetoj në Hamburg me familjen dhe miqtë, por e kësaj është se mund të jem i regjistruar në listën e përfituesve vetëm në një shtet dhe në Kroaci mund të isha në listën e pritjes vetëm nëse do të zhvendosesha aty. Është një vendim shumë i vështirë por unë kam vendosur të qëndroj këtu në Gjermani”, thekson ai.

Aktualisht, ish sulmuesi i nënshtrohet hemodializës tri herë në javë dhe do të vazhdojë të ndjekë të njëjtën rutinë deri në gjetjen e një veshke që mund ta mbajë në jetë.

Një histori vërtet e trishtë që vë në dukje se sa e brishtë mund të jetë jeta edhe për ata njerëz që dikur kanë qenë idhuj për mijëra tifozë.