Gwen Stefani pranon se ka një “palë të tretë” në martesën e saj me Blake Shelton

Këngëtarja e njohur Gwen Stefani ka zbuluar se këshilla më e mirë që mund t’u japë çifteve është që të ftojnë një “palë të tretë” në martesën e tyre – dhe jo, nuk bëhet fjalë për ndonjë person tjetër, por për Zotin.

55-vjeçarja tha se ajo dhe bashkëshorti i saj, këngëtari i muzikës country Blake Shelton, varen pikërisht nga besimi dhe prania e Zotit për të mbajtur marrëdhënien e tyre të qëndrueshme dhe të shëndetshme.

E ftuar në emisionin The Drew Barrymore Show, Stefani foli hapur për rolin që forca hyjnore ka në lidhjen e saj me Sheltonin, 48 vjeç. Si një katolike e devotshme, ajo tregoi se besimi ka qenë shtylla e marrëdhënies që nga fillimet e tyre në vitin 2015, kur u njohën si trajnerë në spektaklin The Voice.

Në atë kohë, Gwen po kalonte një divorc të vështirë nga Gavin Rossdale, me të cilin ka tre fëmijë: Kingstoni (18), Zuma (16) dhe Apollo (11), ndërsa Shelton po përfundonte martesën me këngëtaren Miranda Lambert. “Të dy ishim në kaos. Asgjë nuk mund të na shpëtonte në atë moment,” ka treguar Stefani më parë për revistën People. “Në një çast i thashë: ‘Nuk mundem më të flas me ty. Është çmenduri. Kam mjaft probleme. Kjo nuk funksionon më. As mesazhe, asgjë më’”.

Megjithatë, Blake nuk hoqi dorë. Ai ia dërgoi Gwen-it një këngë të papërfunduar, duke i propozuar ta shkruanin bashkë – e kështu lindi dueti i tyre “Go Ahead and Break My Heart”, publikuar në vitin 2016. “Besoj se ai donte vërtet të më impresiononte,” tha Gwen. “Ai nuk shkruan më këngë si dikur, por unë e adhuroj të shkruarit e këngëve. Është mënyra si ndjej që kam vlerë, që kam një qëllim”.

Çifti u martua në korrik të vitit 2021, në një ceremoni intime në fermën e Sheltonit në Oklahoma. Blake ka rrëfyer më pas se ishte pikërisht Gwen ajo që e frymëzoi të besohej më shumë në Zot dhe ta bëjë pjesë të përditshme të jetës së tij. “Ajo më bëri të shkoj për herë të parë në kishë,” ka thënë ai për Fox News. “Ishte koha për të kthyer faqen. Nëse heq Zotin nga kjo histori, asgjë nuk ka kuptim. Por kur e vendos Atë në qendër, çdo gjë që ka ndodhur mes nesh merr kuptim”. /Telegrafi/