Trajneri i Manchester Cityt, Pep Guardiola, do të konsideronte mundësinë e bërjes trajner i Kombëtares së Italisë në verë, pavarësisht se i ka mbetur edhe një vit në kontratën e tij me gjigantët e Ligës Premier.
Azzurrët do të emërojnë një trajner të ri pas 22 qershorit, kur do të zgjidhet presidenti i ri i Federatës italiane të Futbollit (FIGC).
Sipas mediumit La Gazzetta dello Sport, trajneri i Cityt, Pep Guardiola, do ta dëgjonte me kënaqësi një ofertë për t’u bërë trajneri i ri i Italisë.
Gazeta italiane raporton se e ardhmja e Guardiolës te Manchester City është larg të qenit e sigurt pavarësisht se kontrata e tij skadon në qershor të vitit 2027.
Ky medium shton se nëse Pep do të largohej nga City, ai nuk do të pranonte një ofertë nga një klub tjetër, pasi do të preferonte të merrte një pushim për t'u rikuperuar nga stresi i shumë viteve në Etihad Stadium.
Megjithatë, kjo nuk do të thotë domosdoshmërisht se spanjolli do të merrte një pushim, siç bëri tashmë në vitin 2012; dhe një punë në ekipin kombëtar do të ishte një kompromis ideal.
Gazzetta dello Sport shton tutje se Guardiola, një ish-mesfushor i Brescias dhe Romës, ka ndërtuar një lidhje të fortë me Italinë dhe do të ishte i hapur për të marrë në konsideratë një ofertë për t'u bërë trajner i Azzurrëve.
Mediumi italian kujton se në vitin 2018, Guardiola refuzoi të përjashtonte mundësinë e ardhjes në Itali si trajner një ditë, edhe pse, disa vite më vonë, ai pranoi: “Çdo gjë e bukur që ndodh në Itali më bën të lumtur, por mendoj se do të preferoja të shkoja në Itali me pushime sesa të jem trajner”.
Legjenda e Italisë, Leonardo Bonucci, një ish-ndihmës i trajnerit të Italisë, Gennaro Gattuso, tha se Guardiola duhet të jetë opsioni i parë për presidentin e ri të FIGC-së: "Mendoj se është shumë e vështirë, por të ëndërrosh nuk kushton asgjë". /Telegrafi/
