Konjufca tregon tri ministritë e preferuara të Vetëvendosjes në bashkëqeverisje

Kandidati për deputet nga Vetëvendosje, Glauk Konjufca, ka folur për preferencat e këtij subjekti për udhëheqjen e ministrive të caktuara.

Konjufca në “Debat Plus” me Ermal Pandurin në RTV Dukagjini ka thënë se është mirë që disa ministri të shkojnë me atë parti të cilës i takon kryeministri, përcjell Telegrafi.

“Ministria e Drejtësisë, Punëve të Brendshme dhe ajo e Financave janë shumë të rëndësishme për Lëvizjen Vetëvendosje pasi me këto kauza është identifikuar sa ishte në opozitë”.

Ai ka thënë se sidomos ministria e Drejtësisë dhe ajo e Punëve të Brendshme janë të rëndësishme pasi kanë të bëjnë me sundimin e ligjit.

“Ne jemi shumë të interesuar të sjellim sundimin e ligjit. E përmes këtyre ministrive mund ta bëjmë sjelljen e ligjit”.

I pyetur për emrin e Veton Surroit si një anëtarë i mundshëm i kabinetit qeveritar, Konjufca ka thënë se ende nuk është mbledhur partia për të diskutuar për emra të caktuar.

Ai ka thënë se në Qeverinë Kurti nuk do të kenë ndikim mbiemrat e caktuar për t’u punësuar pa të drejtë në institucione./Telegrafi/