Supermodelja braziliane, Gisele Bundchen, do t’i bashkohet ekipit të Princit William për një kauzë të rëndësishme mjedisore në Brazil.
Princi i Uellsit krijoi në vitin 2020 ‘Çmimin Earthshot’, që synon të nderojë njerëz dhe ide novatore për zgjidhjen e problemeve të planetit.
Tani, Gisele do të jetë pjesë e panelit që do të përzgjedhë fituesit e këtij çmimi së bashku me figura të njohura si: Cate Blanchett, David Attenborough dhe Ngozi Okonjo-Iweala.
Ata do të zgjedhin projektet më të mira nga 15 finalistët që punojnë për të mbrojtur natyrën, pastruar ajrin, ringjallur oqeanet, eliminuar mbeturinat dhe mbrojtur klimën.
Gisele është prej kohësh e angazhuar në çështje mjedisore – ka ndihmuar në krijimin e Projektit të Ujërave të Pastra në Brazil, mbrojtjen e kafshëve dhe qëndrueshmërinë, si dhe përmes Fondacionit Luz promovon shëndetin, arsimin dhe të drejtat e grave e fëmijëve.
Në deklaratën e saj, ajo tha se është krenare të përfaqësojë Brazilin dhe se “çdo veprim ka rëndësi - i vogël apo i madh - për të mbrojtur planetin tonë”.
Ndërkohë, Princi William pritet të marrë pjesë në disa ngjarje në Rio de Janeiro, para se të udhëtojë drejt konferencës së klimës së OKB-së në Belem më 6 tetor. /Telegrafi/
Princi William
