Frontmeni i grupit legjendar “Scorpions”, Klaus Meine, i ka mohuar deklarimet se hitin e madh, “Wind of Change”, e ka shkruar CIA si pjesë e propagandës së Luftës së Ftohtë.

Këngëtari gjerman ishte pjesë e emisionit “Trunk Nation” në SiriusXM, ku sqaroi se një gazetar e kishte kontaktuar lidhur me hetimet rreth baladës së fuqishme të vitit 1990 që është shndërruar në një himn botëror.

Gazetari Patrick Radden Keefe i ka hulumtuar teoritë se agjencia e inteligjencës amerikane kishte bashkëpunuar me bendin gjerman për të realizuar një këngë, e cila do ta ndryshonte botën.

Sipas teorisë konspirative të hulumtuar nga Keefe, CIA ishte angazhuar në realizimin e kësaj balade, në mënyrë që ta destabilizonte Bashkimin Sovjetik.

Meine ka thënë se gazetari e kishte pyetur në lidhje me Festivalin e Muzikor të Paqes në Moskë dhe më pas kishte dashur detaje për këngën “Wind of Change”.

Frontmeni i Scorpions, Klaus Meine (Foto: Wagner Meier/Getty Images/Guliver)

“Dhe kah mesi i intervistës, më tha: ‘Klaus, e ke dëgjuar ndonjëherë tregimin se ‘Wind of Change’ është shkruar nga CIA?’ Ndërsa unë shpërtheva së qeshuri, plasa krejt duke qeshur”, ka rrëfyer këngëtari.

Meine më pas ka theksuar se edhe pse i është dukur mjaft qesharake ideja, është dashur të sqarojë se bëhet fjalë për lajm të rremë.

“Mu duk shumë për të qeshur dhe vazhdova së qeshuri. Është tregim mjaft argëtues dhe vërtet i çmendur, por siç kam thënë, nuk është aspak i vërtetë. Siç thoni ju amerikanët, është një lajm i rremë”, ka deklaruar vokalisti i “Scorpions”. /Telegrafi/