Forcat ruse po humbasin iniciativën në zonën e Bakhmut – thotë ISW

Trupat ruse po humbasin iniciativën në zonën e Bakhmut, pavarësisht natyrës së kufizuar të kundërsulmeve të ukrainasve.

Raporti thoshte se zyrtarët rusë dhe ukrainas pranuan se kundërsulmet e kufizuara ukrainase pranë Bakhmut po vazhdonin edhe më 17 maj, shkruajnë mediat e huaja, përcjell Telegrafi.

Veçanërisht, Hanna Maliar, zëvendësministrja e Mbrojtjes e Ukrainës, deklaroi se trupat ukrainase po përparojnë në fronte të paidentifikuara në krahët e Bakhmut.

Në të njëjtën kohë, Serhii Cherevatyi, zëdhënës i Grupit të Forcave Skhid (Lindje), tha se mbrojtësit kishin avancuar deri në 500 metra në frontin e Bakhmut gjatë 24 orëve dhe po vazhdonin të përparonin në krahët e rusëve.

Lexo po ashtu Pyetja që i ka bërë komandantët rusë “të kruajnë kokën”: Çfarë e ka bërë mbrojtjen ajrore të Ukrainës kaq të padepërtueshme?

Ministria ruse e Mbrojtjes deklaroi gjithashtu se Forcat Ajrore Ruse (VDV) kishin arritur një përparim të lehtë, por pranuan se Ukraina po vazhdon me kundërsulmet e saj në rrethinat e Bakhmut në zonën e Bohdanivka (5 km në veriperëndim të Bakhmut) dhe Ivanivske (6 km në perëndim të Bakhmutit).

Yevgeny Prigozhin, financier i Kompanisë Private Ushtarake Wagner, mohoi deklaratën e Ministrisë së Mbrojtjes për përfitimet territoriale dhe i kritikoi ata për paraqitje të rreme të tërheqjes si kapje pozicionesh të reja.

“Një bloger ushtarak i shquar u ankua se forcat ruse tani duhet të reagojnë ndaj veprimeve të Ukrainës, duke nënkuptuar se forcat ruse po humbasin iniciativën në zonën e Bakhmut, pavarësisht natyrës së kufizuar të kundërsulmeve ukrainase në zonë”, thuhet në raportin e ISW. /Telegrafi/