Erdogan e quajti Netanyahun kasapin e Gazës: Ai duhet të gjykohet për krime lufte

Presidenti turk Recep Tayyip Erdogan tha se kryeministri izraelit Benjamin Netanyahu duhet të gjykohet sepse ai është një “kriminel lufte”, duke e quajtur atë “kasap i Gazës”.

“Ne nuk do të lejojmë që çështja e Izraelit që ka armë bërthamore të harrohet”, tha Erdogan në fjalimin e tij hapës në një takim të Organizatës së Bashkëpunimit Islamik (OIC) në Stamboll, transmeton Telegrafi.

“Ata që përpiqen të injorojnë në heshtje vdekjen në Gaza, madje ta legjitimojnë atë me pretekstin e Hamasit, nuk kanë asgjë për t’i thënë më njerëzimit. Izraeli nuk është vetëm një vrasës, por edhe një hajdut”, tha Erdogan.

Ai tha se Izraeli nuk mund të lejohet të ripushtojë Gazën.

Lexo po ashtu Izraelitët bombardojnë dy shkolla në Gazë, të paktën 50 palestinezë të vrarë

“Ka një strukturë globale që funksionon me vullnetin e disa vendeve. Struktura e korruptuar e OKB-së duhet ndryshuar,” tha Erdogan.

Presidenti turk tha se islamofobia po përhapet si një epidemi në Perëndim.

“Turqia është gati të jetë një vend garantues për negociatat e paqes midis Izraelit dhe Palestinës. Gaza është territor palestinez. Gaza është e palestinezëve dhe do të mbetet e tillë përgjithmonë,” tha Erdogan.

Akuzoi Netanyahun për ide ekspansioniste.

“Ata që sulmojnë Gazën nesër do të shikojnë diku tjetër. Kasapi i Gazës Netanyahu ka zbuluar se ai ka ideale ekspansioniste,” tha Erdogan. /Telegrafi/