E ardhmja dhe opsionet e McGregor pas humbjes së rëndë nga Khabib

Conor McGregor e bëri rikthimin e shumëpritur në tetëkëndëshin e UFC-së, mirëpo asgjë nuk shkoi siç kishte planifikuar, sepse u mposht nga Khabib Nurmagomedov në duelin Las Vegasit.

Irlandezi u kthye pas mungesës afro dyvjeçare, mirëpo u nënshtrua nga kundërshtari i tij, i cili me një kapje për fyti e detyroi ta dorëzojë meçin në raundin e katërt.

Rikthimi i Conor McGregor nuk shkoi ashtu siç kishte planifikuar (Photo by Harry How/Getty Images)

Rezultati nxiti skena kaotike, pasi ylli nga Dagestani doli nga tetëkëndëshi për t’u përleshur me anëtarët e stafit të McGregorit, derisa edhe ky i fundit u përlesh me pjesëtarët e ekipit të Khabibit.

Incidentet pritet t’u kushtojnë të dy yjeve të arteve të përziera marciale, pasi do të dënohen, ndërsa dënimi maksimal që mund t’i jepet Nurmagomedovit është marrja e titullit.

Khabib e mposhti McGregorin në raundin e katërt (Photo by Harry How/Getty Images)

Përkundër humbjes dhe natyrës së saj, McGregor vazhdon të jetë ylli kryesor i UFC-së dhe ka para vetes disa opsione.

Prandaj më poshtë jua sjellim veprimet që mund të ndërmarrë 30-vjeçari në të ardhmen sa i përket karrierës së tij.

Khabib Nurmagomedov

Rimeçi ndaj Khabib është një opsion për McGregor (Photo by Harry How/Getty Images)

Ajo që ndodhi në Las Vegas është një mundësi e mirë për përfitime marramendëse të yjeve të UFC-së nëse vendosin për një rimeç.

McGregor tashmë është shprehur i gatshëm që të ndeshet sërish me kampionin në fuqi në kategorinë e peshave të lehta.

Mirëpo, ai duhet të matet mirë para se të hyjë sërish në tetëkëndësh me yllin e pamposhtur të arteve të përziera marciale.

Tony Ferguson

Tony Ferguson (Photo by Ethan Miller/Getty Images)

Nëse McGregor dëshiron të vazhdoj të ndeshet në UFC, atëherë dueli ndaj Tony Ferguson do të ishte vendimi më logjik i mundshëm.

Dy yjet e arteve të përziera marciale kanë papëlqyeshmëri të madhe ndaj njëri-tjetrit, ndërsa Ferguson qe një kohë të gjatë ka kërkuar një duel me yllin nga Dublini.

Tony renditet i dyti në kategorinë e peshave të lehta në UFC, prandaj nuk është kundërshtar aspak i lehtë. Ndërsa nëse arrin fitore ndaj tij, McGregor e fiton të drejtën për një tjetër duel me Khabibin.

Floyd Mayweather

Dueli ndërmjet Conor McGregor dhe Floyd Mayweather (Photo by Sean M. Haffey/Getty Images)

Conor fitoi mbi 100 milionë dollarë në vitin e kaluar kur u ndesh në ring (me rregulla të boksit) kundër kampionit të pamposhtur, Floyd Mayweather.

Meçi u ndërpre në raundin e tetë, mirëpo paraqitja e tij në boks u vlerësua shumë duke i befasuar edhe kritikët më të mëdhenj.

Boksieri amerikan, i cili ka rekord 50-0, është pensionuar sërish, mirëpo mund të rikthehet në rast të një organizimi shumëmilionësh.

Mayweather dëshiron ta provojë veten në artet e përziera marciale, ashtu që një rimeç me McGregor mund të jetë me rregullat e UFC-së.

Sidoqoftë, së fundmi është raportuar se ai mund t’ia ofrojë një shans të dytë Manny Pacquiaos.

Anderson Silva

Anderson Silva ka dominuar në kategorinë e peshave të mesme gjatë viteve 2006 – 2013 (Photo by Buda Mendes/Getty Images)

Para duelit ndaj Nurmagomedov, McGregor ishte pyetur për kundërshtarin e radhës, ndërsa një emër befasues në listë ishte ai i ndoshta luftëtarit më të mirë në histori të UFC-së.

Braziliani Anderson Silva ka dominuar në kategorinë e peshave të mesme gjatë viteve 2006 – 2013, ndërsa në një periudhë kishte regjistruar 16 fitore radhazi.

Mirëpo, ditët më të mira të 43-vjeçarit tashmë i takojnë të kaluarës, duke qenë se në gjashtë duelet e fundit ka regjistruar katër humbje.

Dallimi në peshë mes Silvas dhe McGregorit mund t’ua prishë planet për një duel në të ardhmen.

Pensionimi

Opsion i hapur për McGregor mbetet edhe pensionimi (Photo by Harry How/Getty Images)

Diçka që vështirë mund të ndodhë, megjithatë duhet përmendur si një nga opsionet në listën e Conorit.

Ai tashmë e ka siguruar jetën e tij financiarisht falë përfitimeve të mëdha nga meçi kundër Mayweather, por edhe nga dueli i fundit kundër Nurmagomedov.

Pse ta rrezikojë shëndetin e tij në këtë sport të dhunshëm që mund t’i shkaktojë dëmtime të pariparueshme?

Përgjigja e kësaj pyetje është se McGregor, përveç se është ylli më i popullarizuar dhe më fitimprurës i UFC-së, ai e do shumë këtë sport. /Telegrafi/