Dëshmia e Shukri Bujës në Hagë, përmendet Limaj e Thaçi

Ish-komandanti i Ushtrisë Çlirimtare të Kosovës, dëshmitari Shukri Buja, gjatë dëshmisë së tij të hënën në Hagë, tha se në kohën kur shkoi për të organizuar njësitet e UÇK-së në vendin e tij të lindjes (Lipjan) nuk e kanë ditur se kush është në Shtabin e Përgjithshëm dhe se nuk kanë marrë urdhra nga ata.

Bujës iu prezantua një fragment i deklaratës së dëshmitarit në çështjen kundër Fatmir Limajt në vitin 2005, ku thoshte se dëshmitari ishte vendosur në Komunën e Shtimes për të organizuar njësitin për Shtimen dhe Lipjanin, Agim Bajrami e ka pasur përgjegjësinë të organizojë njësitet në Kaçanik.

Ndërsa, për Limajn kishte thënë se e ka pasur përgjegjësinë për organizimin e njësitit në Malishevë.

Sipas prokurorit James Pace, dëshmitari kishte thënë se “urdhrat për njësitet guerile jepeshin nga Shtabi i Përgjithshëm”.

“Po, është e saktë. Unë e kam sqaruar. Ne i kemi pritur urdhrat nga Shtabi i Përgjithshëm por kush është Shtabi i Përgjithshëm nuk e kemi ditur dhe nuk na është dhënë ndonjë urdhër në atë kohë nga Shtabi i Përgjithshëm”, tha Buja.

Përpara kësaj, dëshmitarit iu prezantua një deklaratë që pretendohet se ai e ka dhënë në vitin 2003 në ish-Tribunalin e Hagës.

“Kjo është një pjesë e intervistës së vitit 2003 për ish-tribunalin e Hagës: Kur keni arritë në Drenicë, grupi me 30 persona ka qenë bashkë? Përgjigje; po kishte 30 anëtarë të grupit kur mbërritëm në Drenicë. Në Drenicë caktuam që të rrijmë në banesa private. Kur mbërritëm atje, shkuam në shtëpi private. Kemi qëndru disa ditë atje. Nuk e di sa ditë, por disa ditë kemi qëndruar. Më pas, u lëshua një urdhër që duhet të shkonim në këtë zonë përfshirë: Suharekën, Malishevën. Ka qenë një zonë jashtë Drenicës. Pyetje; në rregull gjatë kohës në Drenicë a jeni informuar për organizimin dhe ndarjen e UÇK-së apo strukturimin e UÇK-së në atë kohë? Përgjigje; jo se nuk patën mundësi të na informonin. Në atë kohë, UÇK-ja e kishte shumë të kufizuar kuadrin e veprimtarive, por edhe unë nga natyra nuk jam kurioz. Si një person që kam qenë në burg unë e dija nga përvoja ime se… ka mbarua këtu”, lexoi prokurori.

Ai shtoi se kur ishte pyetur se kush e dha urdhrin të shkonin në atë zonë, Buja ishte përgjigjur “Unë nuk e di se kush ishte personi që e ka lëshuar urdhrin, por mua këtë urdhër ma ka përcjellë Hashim Thaçi”, raporton betimiperdrejtesi.

I pyetur të hënën në Hagë nëse kjo deklaratë që e kishte dhënë në vitin 2003 ishte e saktë, Buja u përgjigj se nuk i kujtohet që ka deklaruar diçka të tillë.

Ndërsa, sipas prokurorit Pace, në një deklaratë të vitit 2005 në çështjen Limaj, dëshmitari kishte thënë se ishte kërkesë e tij që u miratua nga Thaçi për të shkuar në territorin që ai njihte për të vepruar në rekrutimin e ushtarëve.

“Po, është miratu edhe nga Hashim Thaçi edhe nga shokët e tjerë. Pra, është fjala për grupin që kemi qenë bashkë. Kur kam kërku që të shkoj në territorin që e kam njoftë. E kanë aprovu të gjithë miqtë, e prej tyre edhe Hashim Thaçi”, tha Buja.

Arsyeja se pse e ka përmendur Hashim Thaçin, sipas dëshmitarit, ishte se atë e kishte njohur me emër e mbiemër ndërsa të tjerët jo.