Aktorja e njohur Demi Moore, e cila këtë vit është anëtare e jurisë në Festivalin e Filmit në Kanë 2026, ka tërhequr vëmendje në tapetin e kuq pasi u shfaq me një fustan rozë voluminoz, duke “sfiduar” rregullat e reja të festivalit për kodin e veshjes.
Moore mori pjesë në premierën e filmit “Paper Tiger” më 24 maj 2026, ku u paraqit me një fustan të madh në stil “ball gown” (fustan princeshe), që sipas mediave, bie ndesh me rregullat e reja më të rrepta të organizatorëve.
Së fundmi, festivali ka prezantuar një sërë udhëzimesh që ndalojnë, mes të tjerash, veshjet “oversized”, sidomos ato me fund të gjatë (train/“shlep”), si edhe çantat e mëdha dhe nuditetin.
Foto: EPA
Organizatorët kanë argumentuar se këto masa lidhen me “efikasitetin dhe mirësjelljen”, pasi veshjet e mëdha “pengojnë qarkullimin e të ftuarve” dhe “vështirësojnë uljen në sallë”.
Fustani i Moore ishte një krijim nga marka Matières Fécales (e themeluar nga Hannah Rose Dalton dhe Steven Raj Bhaskaran), ndërsa këpucët ishin në bashkëpunim me Christian Louboutin.
Foto: EPA
Kreacioni vjen nga koleksioni Vjeshtë/Dimër 2026, me titullin “One Percent”, i përshkruar si një “satirë e errët” e pasurisë ekstreme dhe elitizmit.
Në pamje të parë, fustani dukej si një zgjedhje “barbiecore”: rozë e ndezur, me fund të gjerë dhe një fjongo të madhe. Por materiali kishte qëllimisht një efekt “të dëmtuar” – mëndafshi ishte punuar me skaje të “shqyera, të djegura dhe të prera”, duke krijuar një kontrast mes ëmbëlsisë së ngjyrës dhe një estetike më konceptuale. /Telegrafi/
