Dafina Zeqiri reagon pas renditjes së Shqipërisë: Politika e Eurovisionit ta ngrit shtypjen

Këngëtarja e njohur shqiptare, Dafina Zeqiri, ka reaguar e zhgënjyer pas përfundimit të finales së Eurovision 2025, ku Shqipëria, e përfaqësuar nga Shkodra Elektronike me këngën “Zjerm”, u rendit në vendin e tetë, pavarësisht mbështetjes së madhe nga publiku.

Dafina, e cila ishte një ndër mbështetëset më të zjarrta të grupit gjatë gjithë rrugëtimit të tyre në Eurovision, nuk i fshehu emocionet pas shpalljes së rezultateve.

Me një postim të shkurtë, por të drejtpërdrejtë në rrjete sociale, ajo shkroi: “Politika e Eurovizionit ta ngrit shtypjen”, shkruan DailyMail.

Deklarata e saj lë të kuptohet se renditja e Shkodrës Elektronike në vendin e tetë nuk ishte për shkak të performancës apo këngës, por si pasojë e prapaskenave politike të këtij konkursi.

“Zjerm” u prit shumë mirë nga publiku evropian, duke marrë 173 pikë në televotim – një nga notat më të larta të mbrëmjes – dhe konsiderohej si një nga performancat më të veçanta dhe artistikisht të guximshme të finales. Megjithatë, votat nga juritë profesionale nuk e favorizuan njësoj, çka ndikoi drejtpërdrejt në rezultatin përfundimtar.

Ndërkohë, Austria u shpall fituese e Eurovision 2025 në një garë të ngushtë dhe plot tension politik, siç u konsiderua nga shumë analistë të festivalit.

Reagimi i Dafinës është një ndër shumë zërat kritikë që po ngrihen pas finales, duke rikthyer në vëmendje diskutimin e kahershëm mbi balancën mes artit dhe politikës në skenën e Eurovisionit. /Telegrafi/