Çitaku kritikon Kurtin: Kosova nuk i takon një njeriu

Nënkryetarja e Partisë Demokratike të Kosovës, Vlora Çitaku, ka reaguar pas masave që ka ndërmarr Bashkimi Evropian ndaj Kosovës, duke thënë se nuk janë shumë të rëndësishme vlerat e humbura nga sanksionimi sa është i madh dëmi që i është bërë Kosovës në raport me ndërkombëtarët.

Përmes një postimi në Facebook, Çitaku ka thënë se “Kosova sot është e përçarë nga brenda, dhe e sanksionuar nga aleatët. Ky është rezultati i qeverisjes së Albin Kurtit”.

Edhe kryetari i LDK-së, Lumir Abdixhiku ka reaguar pas bërjes publike të masave që do të ndërmarr BE ndaj Kosovës, duke thënë se “Albin Kurti dhe politika e tij nuk e bën dot Kosovën shtet evropian. Kosova nuk ka qenë kurrë më keq ndërkombëtarisht se sa sot. Serbia nuk ka pasur kurrë më shumë përkrahje se sa tani.  Koha e fundit për një rrugë të re pa Kurtin dhe politikën e tij të izolimit”.

Ndërsa, kryetari i Aleancës për Ardhmërinë e Kosovës, Ramush Haradinaj, ka thënë se masat e BE-së ndaj Kosovës dhe paralajmërimet e ShBA-së, e dëshmojnë se sa e rrezikshme është gjendja.

“I vetëdijshëm se Kosova me këtë kryeministër po hyn në një rrugë pa krye, para pak ditësh kërkova mocion për shkarkimin e Albin Kurtit”, ka shkruar Haradinaj.

Lexo po ashtu BE vendos disa masa ndaj vendit tonë: E kemi njoftuar edhe Qeverinë e Kosovës

Bashkimi Evropian ka marrë disa masa ndaj Kosovës për shkak se ka konsideruar se nuk janë ndërmarrë veprime për shtensionim të situatës në veri të Kosovës, hapa të cilët janë kërkuar vazhdimisht nga përfaqësuesit e BE-së.

/Telegrafi/