Kampionia e Kosovës në hendboll, Besa Famgas, ka mësuar kundërshtarin e radhës për rrethin e tretë në Kupën Evropiane.

Skuadra nga Peja do të takohet me atë rumune, Potaissa Turda, me shortin që u tërheq të hënën pasdite në Vjenë.

Federata e Hendbollit e Kosovës njoftoi se ndeshja e parë zhvillohet më 27 apo 28 nëntor në Pejë, ndërsa e kthimit një javë më vonë në Rumani.

Skuadra pejane, Besa Famgas, në raundin e dytë të Kupës Evropiane e eliminoi Borcin e Banjallukës. Ndeshjen e parë në Banjallukë, Borci e kishte fituar me tri gola dallim, por të dielën në Pejë, Besa fitoi me shtatë gola dallim, 29:22.

Skuadra kosovare tani e kërkon suksesin edhe në raundin e tretë, por nuk do ta ketë lehtë. Skuadra nga qyteti Turda ishte fituese e Kupës Sfiduese në vitin 2018.

Potaissa Turda vjet ishte ndalur në raundin e dytë kualifikues të Ligës Evropiane. Në vitin 2017, Turda ishte përballur me Trepçën dhe i kishte fituar dy ndeshjet në Mitrovicë.

Është prej skuadrave më të forta në Kupën Evropiane. Por pejanët do të japin më të mirën për ta kaluar edhe një skuadër të fuqishme. /Telegrafi/