Baton Haxhiu flet për 10 vjetorin e Shteti të Kosovës (Video)

Publicisti Baton Haxhiu thotë se Kosova në këtë dhjetë vjet si shtet ka një dashuri të njeriut të saj, ndërsa jetohet më mirë dhe më qëndrueshëm.

Ai pohon se ndjenja e lirisë në këtë dekadë të pavarësisë është se Kosova kurrë më nuk mund të kthehet ndryshe, në pikën kur qytetarët e saj ishin me mungesën e ndjenjës së shtetit dhe me ndjenjën se dikush mund t’i sundojë.

“Në 10 vjet, kemi bërë një përpjekje për shtet-ndërtim. Kemi qenë të kufizuar për shumëçka. Kemi qenë edhe me ndërgjegje, por edhe pa të ndonjëherë. E kemi pasur peshën e presionit të Evropës dhe Amerikës për kompromise, kemi pasur peshën e pasigurisë që na vjen nga shtetet përreth. Por, përcaktimi ynë është evropian dhe me përcaktimin evropian ndonjëherë disa gjëra edhe duhet të tolerohen”, thotë Haxhiu.

“E rëndësishme është paqja. E rëndësishme është që kurrë të mos ketë luftë, sepse lufta është e rëndë. E rëndësishme është që njerëzve t’u jepet arsim dhe shëndetësi e mirë, dy pikat që e ruajnë substancën njerëzore në Kosovë. Dhe natyrisht, njerëzit duhet të kenë shpresë”, shton ai.

Haxhiu është shprehur se shteti i Kosovës nuk ka kthim prapa, ashtu siç liria nuk ka kthim prapa, ndërsa ka pohuar se idetë e bashkimit të shqiptarëve janë të kryera.

“Mendoj që rrugët bashkimit më janë të qarta, janë vetëm disa finesa që na ndalin. Idetë e bashkimit të shqiptarëve janë të kryera, përveç që nuk janë kryer formalisht”, thotë ai. /Telegrafi/