Kosova merr barazim ndaj Zvicrës si mysafir, Helvetët kalojnë tutje

Kosova dhe Zvicra kanë luajtur baraz me rezultat 1-1 në sfidën e luajtur në “St Jakobs-Park” në qytetin e Bazelit, ndeshje kjo e vlefshme për kualifikueset e Euro 2024.

Ndeshja nisi me një dominim të Zvicrës të cilët kishin posedimin dhe rastet në anën e tyre.

Vendasit patën disa mundësi të mira për gol, fillimisht me Ruben Vargas por gjuajtjet e tij u ndalën me sukses nga Visar Bekaj.

Rastin më serioz zviceranët e patën në minutën e 18-të, ku në portën e boshatisur Remo Freuler gjuajti jashtë kuadratit të portës.

Kosova në anën tjetër ishte shumë afër golit të epërsisë, kur në minutën e 37-të goditja me kokë e Elbasan Rashanit shkoi shumë afër shtyllës së Yann Sommer.

Pa gola përfundoi edhe 45 minutëshi i parë i këtij takimi.

Me të filluar pjesa e dytë që në aksionin e parë, Zvicra kaloi në avantazh pasi Ruben Vargas shënoi me kokë për 1-0 në minutën e 47-të pas një tollovie në zonë.

Kosova mundohej herë pas here me ndonjë kundërsulm për të rrezikuar por pa sukses.

Zviceranët patën edhe disa raste të mira shënimi me Noah Okafor, i cili madje shënoi gol por u anulua për pozitë jashtë loje.

Pas pësimit të golit Kosova nisi të bëhej më kërkuese dhe e gjeti golin në minutën e 82-të, ku autor i golit ishte sulmuesi Muhamet Hyseni i cili shënoi për 1-1 pas asistimit të Mërgim Vojvodës.

GoaL! | Switzerland 1-1 Kosovo | Muhamet Hysenipic.twitter.com/mxhlY7tVWo

— FootColic ⚽️ (@FootColic) November 18, 2023

Deri në fishkëllimën e fundit të gjyqtarit nuk pati më raste të mira shënimi dhe sfida përfundoi me rezultat të barabartë 1-1 dhe tanimë zyrtarisht Rumania dhe Zvicra siguruan biletën e kualifikimit për në Euro 2024./Telegrafi/