Tottenham Hotspur shënoi katër gola në fitoren ndaj Burnleyt, ndërsa Gareth Bale i ka gëzuar tej mase tifozët e Spursave në ndeshjen të cilën e nisi si startues.

Anësori anglez ishte i përfshirë në katër golat e skuadrës së tij, dy prej të cilëve i shënoi vet, një asistoi dhe në një tjetër ishte ndërtues i aksionit.

Mjaftuan 68 sekonda lojë që rezultati të zhbllokohej, ndërsa golashënues ishte Bale (2’), i cili u asistua nga Heung-Min Son.

(Foto: Instagram/garethbale11)

Një superasistim i gjatë nga 31-vjeçari drejt Harry Kane (15’) rezultoi me dyfishimin e epërsisë për Spursat.

Bale ishte i përfshirë edhe në aksionin e golit të tretë, të cilin e shënoi Lucas Moura në minutën e 31-të.

(Foto: Instagram/garethbale11)

Në gjysmën e dytë (55’), Bale e mbylli në mënyrën më të mirë rezultatin përfundimtar duke shënuar një gol të bukur pas asistimit nga  Son Heung-Min.

Pritet të shihet në ndeshjet në vijim nëse ky moment do të shënojë rikthimin e Gareth Bale në formën e dikurshme. /Telegrafi/