LAJMI I FUNDIT:

Albion Rrahmani fiton çmimin e Telegrafit “Më i Miri nga lexuesit” për vitin 2022

Albion Rrahmani fiton çmimin e Telegrafit “Më i Miri nga lexuesit” për vitin 2022

Sulmuesi i Ballkanit, Albion Rrahmani ka fituar çmimin “më i miri nga lexuesit” për vitin 2022, çmim i cili dhurohet për herë të parë këtë vit nga redaksia e sportit në portalin numër një në vend Telegrafi.

Portali juaj, Telegrafi.com apo më saktësisht redaksia e sportit ka vendosur të jap një çmim të ri për vitin 2022 dhe ai do të zgjidhet pikërisht nga lexuesit tanë besnik, votat e të cilëve do të zgjedhin rrjedhimisht futbollistin më të mirë për vitin 2022 në Kosovë.

Sondazhi u hap në faqen e Telegrafit dhe rrjetet sociale me datë 14 dhjetor dhe ishte i hapur për të votuar deri në ora 23:59 të datës 20 dhjetor.

Në këtë sondazh ku ishin plot 17 futbollistë, pati mbi 8000 vota apo më saktësisht plot 8046 vota, të cilat zgjodhën edhe fituesin.

Fitues i çmimit “më i miri nga lexuesit” ishte sulmuesi llapjan i Ballkanit, Albion Rrahmani, i cili fitoi 32 për qind të vota të përgjithshme.

Rrahmani në këtë garë la pas vetes bashkëlojtarët e tij si Meriton Korenica që u rendit i dyti me 22 për qind, Armend Thaqi i treti me 12 për qind, Lumbardh Dellova i katërti me 11 për qind dhe Ermal Krasniqi i pesti me katër për qind.

Të gjithë pjesëmarrësit tjerë përfunduan me numër të vogël votash, që në përqindje i bie dy apo një për qind.

Votat e sondazhit të Telegrafit

Ky çmimi i lexuesve do t’i ndahet Rrahmanit ditën e premte të kësaj jave apo më saktë me datë 23 dhjetor, në redaksinë e portalin Telegrafi.com.

Krahas këtij çmimi të lexuesve, Telegrafi Sport do të vazhdoj me traditën e ndarjes së çmimeve të përhershme, tash e disa vite si “Lojtari i Vitit”, “Trajneri i Vitit”, “Portieri i Vitit”, “Mbrojtësi i Vitit”, “Mesfushori i Vitit”, “Sulmuesi i Vitit” dhe “Talenti i Vitit”.

Ndryshe, Rrahmani ishte njëri nga më meritorët në suksesin e Ballkanit këtë sezon ku u kualifikuan në Ligën e Konferencës, pasi shënoi 7 gola në 6 ndeshje, ndërsa në sezonin vjeshtor në Superligën e Kosovës, llapjani ka shënuar 7 gola dhe 3 asistime në 17 ndeshje. /Telegrafi/