Aktorja e Adolescence pohon se fraza për Andrew Tate në serial ishte e improvizuar por që regjisori ia miratoi

Faye Marsay ka folur për rolin e saj në hitin global “Adolescence”, duke zbuluar se Stephen Graham mbajti një fjalim emocionues para xhirimeve, i cili la aktorët në lot.

Aktoria 38-vjeçare, e cila luan rolin e DS Misha Frank në këtë serial të njohur ndërkombëtarisht, ka shprehur pasionin e saj për tematikën e rëndë që trajton seriali.

Në një intervistë për podcastin Reign with Josh Smith, Faye tregoi se krijuesi dhe aktori kryesor i shfaqjes, Stephen Graham, mbajti një fjalim motivues para se të niste xhirimet e episodit të parë, ku i theksoi ekipit se shfaqja kishte mundësinë të bënte një ndryshim të vërtetë.

Ajo e kujtoi momentin: “Ishim gati për të xhiruar episodin e parë, pasi kishim bërë dy javë provash, dhe Stephen mblodhi të gjithë së bashku në një shesh fshati, ku ishin vendosur të gjithë karvanët. Ishte një fjalim shumë fuqizues, ku na tha sa e veçantë ishte që ishim të gjithë këtu duke punuar për këtë projekt, që mundësi të tilla nuk vijnë shpesh dhe që skenarë si ky janë të rrallë. Na tha se mund të bëjmë një ndryshim të vërtetë me këtë shfaqje.”

Ajo vijoi: “E krahasoi me një ekip futbolli, ku të gjithë ishim në të njëjtin ekip dhe ky ishte finalja e Ligës së Kampionëve. Pasi mbajti këtë fjalim, ai vendosi të luajë një këngë dhe, e di që mund të të duket si e kotë, por ishte një moment shpirtëror dhe të gjithë po përqafoheshin, disa po qanin dhe na rriti shumë emocionet për të xhiruar”.

Faye gjithashtu tregoi se një nga rreshtat më të paharrueshëm të personazhit të saj ishte improvizuar, duke përfshirë një referencë ndaj influencerit, Andrew Tate.

Ajo e shpjegoi se kjo frazë kishte dalë spontanisht gjatë provave, por regjisori Philip Barantini e kishte dashur dhe kishte vendosur ta përfshinte atë në skenar.

Faye shtoi: “Gjatë provave, bëmë një lexim dhe thashë krejt papritur, ‘ato broçkullat Andrew Tate’, dhe e mbaj mend që Phil qeshi dhe më shikoi, duke më thënë, ‘mbaje në skenar’. Kur erdhi momenti për të thënë këtë frazë, desha të përcillja lodhjen që ndjejnë gratë lidhur me këtë tematikë tronditëse, pasi kanë qenë të ekspozuara ndaj saj kaq shpesh, saqë janë mësuar me të”. /Telegrafi/