Gjatë javëve të fundit ka pasur shumë spekulime lidhur me një rikthim të mundshëm të Jose Mourinhos te Real Madridi. Portugezi, i cili e drejtoi skuadrën në “Santiago Bernabeu” nga viti 2010 deri në 2013, është kandidati i preferuar i presidentit Florentino Perez për ta marrë drejtimin, në rast se Alvaro Arbeloa shkarkohet, siç pritet.
Mourinho mbetet një figurë e vlerësuar brenda zyrave të Real Madridit, ndërsa te tifozët opinionet janë të ndara, sidomos pas komenteve të tij lidhur me polemikat e fundit që përfshinë Vinicius Juniorin dhe Gianluca Prestiannin.
Edhe lojtarët kanë dhënë mendimin e tyre, tani që një rikthim i mundshëm i tij po bëhet gjithnjë e më real.
Sipas gazetarit Gaston Alvarez, dhoma e zhveshjes te Real Madridi nuk e ka Mourinhon si kandidatin e preferuar për sezonin e ardhshëm; këtë “nder” ia japin Jurgen Kloppit. Vlen të theksohet se ka disa persona brenda klubit që shprehin shqetësime për trajnerin aktual të Benficës.
“Klopp pëlqehet shumë më tepër se Mourinho. Mourinho është një bombë me sahat dhe, në një dhomë zhveshjeje ku ka mënyra të caktuara veprimi dhe njëfarë egoizmi, një njeri si ai mund të vijë dhe të përplaset drejtpërdrejt me ta, dhe ata e dinë këtë”, citohet të ketë thënë Alvarez.
Më tej, Alvarez shpjegoi pse Perez e sheh Mourinhon kaq pozitivisht.
Është pranuar se Klopp do të ishte kandidati më i mirë si trajner, por në rastin e portugezit, ardhja e tij shihet si diçka që mund t’i bëjë tifozët të harrojnë shpejt dështimet e klubit gjatë dy sezoneve të fundit.
“Florentino e di se ai që e entuziazmon është Klopp, por e di gjithashtu se nëse vjen Mourinho, pas rreth tre javësh, zhurma që krijon figura e tij do t’i bëjë tifozët të harrojnë gjithçka që ka ndodhur”, shtoi ai.
Do të jetë interesante të shihet se si do të zhvillohet kjo situatë te Real Madridi në javët në vijim./Telegrafi/
