Abdixhiku: Veriu po sulmohet nga bandat e Vuçiqit, e Kurti në sulm ndaj miqve ndërkombëtarë

Kryetari i Lidhjes Demokratike të Kosovës, Lumir Abdixhiku tha sot se kjo javë nuk ishte e zakonshme dhe se vendi prej të premtes po ballafaqohet me një situatë të pamenduar dhe të paparë që një kohë të gjatë.

Abdixhiku në një konferencë për media tha se Kosova është në sulm të vazhdueshëm nga bandat kriminale të Vuçiqit e kryeministri i Kosovës në sulm për fat të keq ndaj miqve tanë ndërkombëtarë.

Ndërkaq, lidhur me këtë, Lidhja Demokratike e Kosovës e ftoi presidenten e vendit që të flasë, të ketë pozicion të qartë dhe të zëshëm në këtë çështje jetike të përballjes publike të Qeverisë së Kosovës me Qeverinë e SHBA-së.

“Kjo nuk i kishte ngjarë ndonjëherë Kosovës më parë. Sa herë kemi qenë të sulmuar nga Serbia, kemi qenë të mbrojtur nga miqtë tanë amerikanë, aleatët evropianë sepse kemi bashkërenduar me ta, kemi bashkëvepruar me ta sepse kemi ndarë të njëjtat vlera, interesa e të njëjtin vizion”, tha ai, raporton Telegrafi.

I pari i LDK-së tha se këtë përmbysje aleancash, vizioni e prioritetesh për Republikën e Kosovës askush nuk e ka dashur në Kosovë.

Abdixhiku tha më tej se për këtë përmbysje askush nuk ka votuar. “Nuk mund të flasim për tjetër gjë përveçse një aventure tejet të rrezikshme personale të Albin Kurtit….”, tha ndër të tjera kryetari i LDK-së, duke shtuar se shkatërrimi i aleancës me miqtë tanë as nuk ka përputhje me vullnetin politik të popullit të Kosovës.

“Duhet thënë në krye të herës – sulmet e bandave parapolitike në veri, bashkimi i tyre me krimin e organizuar, dhe prania e interesave pro ruse brenda këtyre formacioneve paraqesin rrezik real për Kosovën, por edhe më gjerë, për tërë rajonin.

Kjo situatë duhet kuptuar drejt nga miqtë tanë perëndimorë. Sulmet ndaj Republikës së Kosovës sot janë sulme ndaj paqes rajonale. Për këtë paqe rajonale, për rëndësinë e saj, ne ndajmë qëndrimet me miqtë tanë ndërkombëtar.

Por Kosova e ka pas ndarë mendjen që t’i përqafojë vlerat perëndimore të paqes e sigurisë, demokracisë e gjithëpërfshirjes, mirëqenies e tolerancës. Ne insistojmë që Kosova të vazhdojë në këtë drejtim. Dhe asnjëherë të mos e humbin fokusin nga interesi ynë strategjik kombëtar nga taktika aventuriere afatshkurta elektorale të politikave të gabuara të momentit”, tha ai.

Sipas tij, situata e krijuar në veri i konvenon pikërisht interesit politik të Vuçiqit dhe interesave luftënxitëse të Rusisë, ndërkaq kështu më së shumti rrezikohet Kosova.

“Prandaj me të drejtë themi se Kosova nuk duhej të binte në grackën e Serbisë. Se përkundër të drejtës absolute, të pakontestueshme e plotësisht legjitime për të organizuar zgjedhje, zgjedhur kryetarë, e ofruar siguri për ta kur ata të janë në punë, Kosova duhet të ketë parasysh edhe relacionet me miqtë tanë”, tha ai.

Sipas tij, Kosova megjithatë ka mundësi edhe të ushtrojë të drejtën edhe të mbajë aleatët në krah. “Për këtë, megjithatë, nuk na duhet një politikë që ofendon me gjuhë jodiplomatike Sekretarin Amerikan të Shtetit, por një që me maturi, me shumë kujdes e me diplomaci, e bind secilin aleat”, tha ndër të tjera Abdixhiku.

Në këtë drejtim LDK-ja e fton fryeministrin në seancë të jashtëzakonshme raportuese për gjendjen në Veri, dhe në veçanti për relacionet e rënduara të Republikës së Kosovës me aleatët tanë, në veçanti me SHBA-të.

LDK-ja kërkon po ashtu koordinim të ngushtë të Qeverisë së Kosovës me kërkesat ndërkombëtare, si hap i parë drejt qetësimit të situatës në veri. /Telegrafi/