Suedia thyen traditën dhe i dërgon armë Ukrainës

Suedia do të dërgojë ndihmë ushtarake në Ukrainë, duke përfshirë edhe armë antitank, helmeta dhe parzmore.

Kjo është bërë e ditur nga kryeministrja Magdalena Andersson, shkruajnë mediat e huaja, përcjell Telegrafi.

“Suedia tani po propozon mbështetje të drejtpërdrejtë për forcat e armatosura të Ukrainës. Ajo përfshin edhe 5,000 helmeta, 5,000 jelekë antiplumb dhe 5,000 armë antitank”, citohet të ketë thënë Andersson në një konferencë shtypi.

Ndryshe, siç ishte thënë ditë më parë, një debat nëse situata e përshkallëzuar në Ukrainë justifikon një përjashtim dhe lejimin e dërgesave të armëve po fitonte terren në Finlandë dhe Suedi – vende me politika tradicionalisht kufizuese të eksportit të armëve.

Sipas Euractiv, legjislacioni në Finlandë dhe Suedi ndalon eksportet e armëve në vendet në luftë ose që shkelin të drejtat e njeriut, përcjell Telegrafi.

Parimi përfshihet gjithashtu në programin e qeverisë aktuale në Finlandë, të cilit presidenti Sauli Niinistö iu referua në konferencën e sigurisë në Mynih fundjavën e kaluar.

Një qëndrim të ngjashëm mbajti edhe Ministrja e Jashtme suedeze Ann Linde (SDP).

Duke komentuar në programin “Agenda” të televizionit suedez javën e kaluar, Linde sqaroi se rregulloret që ndalojnë eksportin e armëve duhet të ndiqen veçanërisht në situata konflikti si ajo aktuale.

Megjithatë, opozita e ka mbajtur gjallë këtë çështje.

Ndërkohë, edhe presidentja e Komisionit Evropian, Ursula von der Leyen, ka bërë të ditur se BE ka rritur mbështetjen për Ukrainën dhe forcuar sanksionet kundër Rusisë.

Ajo ka thënë edhe se Komisioni Evropian po mbyll hapësirën ajrore të BE-së për aeroplanët rusë.

Presidentja e Komisionit Evropian ka shtuar se BE do të ndalojë gjithashtu mediat shtetërore ruse RT dhe Sputnik. /Telegrafi/