Zyrtare: Valon E’themi bashkohet me Istanbulspor, tani janë tre shqiptarë në skuadrën turke

Ka shkruar në tre numri i shqiptarëve te Istanbulspor, pasi klubi nga Stambolli ka zyrtarizuar afrimin e Valon E’themin.

Shqiptari nga Maqedonia e Veriut, bashkohet me Eduart Rrocës dhe Kristal Abazajt që tashmë me sukses po mbrojnë ngjyrat e këtij klubi.

Ka qenë vetë klubi i Istanbulspor që ka zyrtarizuar afrimin e E’themit, i cili ka nënshkruar për katër vite e gjysmë.

Mesfushori mbylli kontratën me Kukësin në verë dhe arriti fillimisht marrëveshje me polakët e Zaglebie Lubin, por klubi shqiptar pretendonte që e ka ende nën kontratë lojtarin duke mos e liruar.

23-vjeçari tani ka kaluar te Istanbulspor me parametra zero, me turqit, që nuk kanë asnjë detyrim financiar ndaj Kukësit sepse Ethemi tashmë ka mbushur 23 vjeç dhe sipas rregullores së FIFA bonuset e formimit të lojtarit, nuk vlejnë më.

Nëse Kukësi do ta lejonte Ethemin të largohej në verë, kishte mundësinë të shpërblehej me rreth 60 mijë euro.

Istanbulspor mban vendin e pestë në renditje me 31 pikë, katër më pak se vendi i parë që mbahet nga Giresunspor. /Telegrafi/