Zelensky: Nëse Rusia largohet nga Ukraina, bisedimet e paqes i fillojmë nesër

“Kievi do të zhvillojë bisedime paqeje me Rusinë nesër, nëse Moska tërhiqet nga i gjithë territori ukrainas”, tha presidenti ukrainas, Volodymyr Zelensky.

Por duke folur në mbyllje të samitit për paqen në Zvicër, ai tha se presidenti rus, Vladimir Putin, nuk do ta përfundonte luftën dhe duhej të ndalohej “në çdo mënyrë që munde”, qoftë me mjete ushtarake apo diplomatike.

Ndihma perëndimore nuk ishte e mjaftueshme për të fituar luftën, shtoi ai, por samiti kishte treguar se mbështetja ndërkombëtare për Ukrainën nuk po dobësohej.

Takimi përfundoi me dhjetëra vende që po angazhohen për integritetin territorial të Ukrainës, shkuan BBC, transmeton Telegrafi.

Gjithashtu, u miratua një dokument përfundimtar, i cili fajësoi Rusinë për vuajtjet dhe shkatërrimin e gjerë të luftës.

Megjithatë, disa vende pjesëmarrëse duke përfshirë Indinë, Afrikën e Jugut dhe Arabinë Saudite nuk e nënshkruan atë.

Lexo po ashtu Komunikata e samitit zviceran kërkon 'integritetin territorial' të Ukrainës

Samiti kishte për qëllim krijimin e mbështetjes më të gjerë të mundshme për një proces që mund të ndihmonte në përfundimin e luftës në Ukrainë.

Rusia nuk ishte e ftuar dhe mbështetësi i saj më i madh Kina nuk ishte e pranishme, duke bërë që disa të vinin dyshime mbi efektivitetin e samitit.

Dokumenti përfundimtar bën thirrje që kontrolli ukrainas të rivendoset mbi termocentralin bërthamor të Zaporizhzhia dhe portet e vendit në Detin Azov, të gjitha të pushtuara aktualisht nga Rusia.

Ai gjithashtu i referohet pushtimit të Rusisë si një “luftë”, një etiketë të cilën Moska e ka hedhur poshtë. Ai bëri thirrje për kthimin e të burgosurve dhe fëmijëve të rrëmbyer nga Rusia.

Duke folur me gazetarët pas samitit, Zelensky falënderoi liderët botërorë që morën pjesë, duke thënë se ai ishte mirënjohës që ata kishin treguar pavarësinë e tyre, pavarësisht presionit nga Rusia që ata të qëndronin larg.

“Ky samit thotë se mbështetja ndërkombëtare për Ukrainën nuk po dobësohet,” tha ai, duke vënë në dukje se shtetet që nuk ishin përfshirë më parë në përpjekjet diplomatike i ishin bashkuar procesit.

Dhe i pyetur nëse pozicioni më i dobët i Ukrainës në fushën e betejës e kishte detyruar atë të merrte në konsideratë lëvizjet diplomatike, ai u përgjigj se nuk ishte kështu dhe Ukraina kishte folur gjithmonë për paqen.

“Rusia mund të nisë negociatat nesër nëse tërhiqet nga territoret tona”, tha ai.

Zelensky tha gjithashtu se Kina nuk ishte armiku i Ukrainës.

“Ne e respektojmë Kinën dhe integritetin e saj territorial, duam që Kina të bëjë të njëjtën gjë për ne” , tha ai, ndërsa i bëri thirrje Pekinit që të angazhohet seriozisht në zhvillimin e propozimeve për paqe.

Zelensky tha se rezultatet e samitit zviceran do t’i komunikohen Moskës “në mënyrë që në samitin e dytë të paqes të mund të rregullojnë fundin e vërtetë të luftës”. /Telegrafi/