Pas tërmetit i cili ndodhi në Shqipëri, nuk kanë të ndalur ndihmat nga Kosova për familjet e prekura nga këto termete.

Ndihma përvç në nivel qëndror, kanë ndarë edhe niveli lokal, përkatësisht disa nga komunat e Kosovës.

Komuna e Drenasit ka ndarë 10 mijë euro për Shqipërinë, ndërsa bizneset e kanë mbështetur me produkte në vlerë mbi 12 mijë euro.

Në njoftimin për media, kryetari Ramiz Lladrovci, ka marrë vendim që t’i dërgohet Kuvendit Komunal, propozim-vendimin për ndarjen e mjeteve buxhetore në vlerë prej 10mijë euro, për të ndihmuar Shqipërinë nga dëmet që i janë shkaktuar nga tërmeti.

Po ashtu Komuna e Gjakovës ka ndarë 14 mijë euro si ndihmë për zonat e dëmtuara nga tërmeti në Shqipëri.

Në njoftimin për media thuhet se kryetari i Komunës së Gjakovës, Ardian Gjini në bazë të kompetencave nxjerr këtë vendim për dhënien e mjeteve financiare në vlerë 14,000€ nga Komuna e Gjakovës për ndihmë për zonat e dëmtuara nga tërmeti në Republikën e Shqipërisë”, thuhet në njoftimin e Komunës së Gjakovës.

Mjetet e ndara do të derdhen në xhirollogarinë e hapur nga Shqipëria për fatkeqësi natyrore.

Edhe kryetari i Komunës së Mitrovicës, Agim Bahtiri, propozoi të vendoset ndihma financiare në vlerë prej 20 mijë euro nga kategoria e Subvencioneve, për ti ndihmuar banorët e prekur nga tërmeti në Shqipëri; Draft- rregullorja për ndarjen e bursave për studentë; Formimi i grupit punues për hartimin ose plotësim-ndryshimin e statutit të komunës me propozim të kryesuesit, Safet Kamberi, të cilat u aprovuan me shumicë votash nga asamblistët komunal.

Ndërsa deri më tani nga tërmetet që ndodhën 31 persona kanë mbetur të vdekur kurse kanë pësuar lëndime 657 të tjerë./Telegrafi/