Vazhdojnë kolonat në Merdare, pritje deri në katër orë

Vazhdojnë problemet në pikat kufitare të Kosovës. Bashkatdhetarët janë bllokuar në pikëkalimin kufitar në Merdare.

Të gjithë qytetarët që ia kanë mësyrë Kosovës nëpër pikën kufitare Merdare janë duke pritur deri në katër orë.

Sipas të dhënave të fundit të Qendrës Kombëtare për Menaxhim Kufitar, të përditësuar në orën 23:30, në Merdare qytetarët janë duke pritur nga katër orë për të hyrë në Kosovë, ndërkaq kolona ka arritur deri në 800 metra.

Pritje ka edhe në Jarinje mirëpo, aty qytetarët janë duke pritur maksimumi 40 minuta.

Edhe te Dheu i Bardhë ka pritje mirëpo, në krahasim me Merdaren dhe Jarinjen, kjo pikë kufitare ka më pak fluks.

Ne Dhe të Bardhë qytetarët janë duke pritur maksimumi 25 minuta për të hyrë në Kosovë, kurse kolona është vetëm 50 metra.

Ndërkaq në Muçibabë pritje deri në 25 minuta ka në dalje të Kosovës dhe kolona ka arritur deri në 100 metra.

Sipas Qendrës Kombëtare për Menaxhim Kufitar, nëpër kufijtë e tjerë pritjet nuk janë më shumë se 10 minuta.

Për të përcjellë në kohë reale gjendjen në pikë-kalimet kufitare qytetarët mund të informohen duke klikuar në web faqen e Qendrës Kombëtare për Menaxhim Kufitar.