Udhëheqësit e shtetit bëjnë homazhe te varri i ish presidentit Rugova dhe veprimtarit Demaçi

Për nder të 12 qershorit Ditës së Çlirimit, presidentja e vendit, Vjosa Osmani, kryeministri Albin Kurti dhe kryeparlamentari Glauk Konjufca, kanë bërë homazhe te varri i ish presidentit të Kosovës, Ibrahim Rugova dhe te varri i veprimtarit Adem Demaçi.

Gjatë ditës, udhëheqësit e shtetit pritet të bëjnë homazhe edhe në kompleksin memorial “Adem Jashari”, si dhe te pllaka përkujtimore e ushtarëve të rënë të NATO-s në Prishtinë, transmeton Telegrafi.

Ndryshe, 24 vjet më parë në Kosovë u vendosën 50 mijë ushtarë të NATO-s dhe bashkë me ta edhe administrata e përkohshme e Kombeve të Bashkuara.

Më 12 qershor të vitit 1999, pas 78 ditë bombardimesh të Aleancës Ushtarake Perëndimore të udhëhequr nga Amerika kundër caqeve ushtarake serbo-malazeze në Kosovë në Serbi dhe Mal të Zi, trupat e NATO-s hynë në Kosovë në misionin paqeruajtës që do të quhej KFOR, duke i dhënë fund luftës gati dyvjeçare midis popullsisë kryengritëse shqiptare të organizuar në radhët e Ushtrisë Çlirimtare të Kosovës dhe forcave okupuese ushtarake dhe policore serbo-malazeze.

Ushtarët e parë të NATO-s që hynë në Kosovë më 12 qershor ishin forcat speciale të Norvegjisë dhe ato të Shërbimit Special Ajror Britanik, duke u gjetur ballë për ballë me trupat e Rusisë të cilët një ditë më parë ‘befasisht’ kishin marrë Aeroportin e Prishtinës me qëllimin e ndarjes së Kosovës. /Telegrafi/