Finalja e Ligës së Kampionëve për edicionin 2018/2019 është e 64-ta me radhë në garën më të madhe evropiane për klube dhe e 27-ta prej se është emëruar në formatin aktual.

Përballja do të zhvillohet në stadiumin Wanda Metropolitano në Madrid të Spanjës më 1 qershor 2019.

(Foto: Dan Mullan/Getty Images/Guliver)

Në këtë finale takohen Tottenham Hotspur që në gjysmëfinale e eliminoi Ajaxin dhe Liverpoolit që bëri një rikthim sensacional ndaj Barcelonës.

Është hera e parë që nga viti 2013 që në finalen e madhe nuk merr pjesë një klub nga Spanja.

Skuadra që do të shpallet kampion, pos gëzimit që bëhet me e mira e Evropës, do ta ketë mundësinë të përballet me fituesin e Europa League për Superkupën e UEFA-s.

(Foto: Clive Brunskill/Getty Images/Guliver)

Njëherësh do të ketë të siguruar kualifikimin në fazën grupore të Ligës së Kampionëve për sezonin e ardhshëm (2019/2020). Nëse veçmë do të jetë kualifikuar nga kampionati i vet, atëherë vendi do t’i rezervohet kampionit të Bundesligas austriake për sezonin 2018/2019.

Për më shumë, në mars të vitit 2018, UEFA ka njoftuar se do të lejohet zëvendësimi i katërt në kohën shtesë, si edhe do të jetë hera e parë që do të përdoret sistemi VAR në një finale të Ligës së Kampionëve, si edhe ora është ndryshuar nga 20:45 në 21:00.

Kjo është finalja e pestë e garës më të madhe evropiane që po zhvillohet në Madrid, pas atyre në vitet 1957, 1969, 1980 dhe 2010 – të gjitha të zhvilluara në stadiumin Santiago Bernabeu.

Kjo është finalja e nëntë e Liverpoolit (që është rekord për një klub anglez), si dhe e dyta radhazi pas humbjes së edicionit të kaluar nga Real Madridi. Redsat i kanë fituar pesë finale (1977, 1978, 1981, 1984, 2005) dhe i kanë humbur tri të tjera (1985, 2007, 2018). Nga ana tjetër, për Tottenhamin, kjo është finalja e parë në histori të klubit. /Telegrafi/