Temperaturat e larta ‘pushtojnë’ Amerikën Perëndimore

Autoritetet në Amerikën Perëndimore kanë bërë të ditur se temperaturat në këto zona tashmë kanë shënuar rekord dhe kanë filluar të marrin jetë njerëzish.

Autoritetet në Arizonë konfirmuan se ekskursionisti i zhdukur 33-vjeçar, Marcus Turowski, u gjend i vdekur të martën, duke u bërë i katërti person në zonën e Tucsonit, që ndërron jetë nga i nxehti ekstrem.

Një tjetër ekskursionist pati të njëjtin fund fatkeq përpara tij, 57-vjeçari Stefan Guenster, trupi i të cilit u gjet të dielën. Në rrethana të ngjashme ndërroi jetë dhe Adrienna Rasmussen, 18 vjeç.

Udhëtimi në këmbë në mes të vapës përvëluese u bë shkas edhe për vdekjen e një 28 vjeçareje dhe një të riu 25 vjeç në Phoenix, ndërsa prej të nxehtit ekstrem një grua 50-vjeçare vdiq në mes të qytetit.

Temperaturat e larta në këto zona kanë ndikuar që autoritetet të paralajmërojnë rreziqet që u kanosën banorëve, duke përfshirë madje edhe rrezikun nga zjarri.

I nxehti i madh po ushqen zjarret në jug të Kalifornisë, ku termometri shënoi temperatura rek ord. Me qindra vetë janë detyruar të braktisin shtëpitë e tyre, ndërsa zjarrfikësit nuk kanë mundur ende ta vënë nën kontroll zjarrin masiv që shpërtheu të dielën në San Diego, e që ka shkatërruar me dhjetëra ndërtesa.