Igli Tare dëshiron një tjetër shqiptar te Lazio dhe tanimë ka nisur bisedimet për ta bërë realitet këtë gjë.

Drejtori sportiv i klubit italian ka kompletuar afrimin e Vedat Muriqit, por nuk mjaftohet vetëm me këtë.

Vlonjate ka nisur bisedimet me Arsenalin për transferimin e mbrojtësit Shkodran Mustafi në Olimpico.

Mustafi duket se do të largohet këtë verë nga Arsenali, teksa i pëlqen ideja për të kaluar te Lazio ku do të mund të luante në grupet e Ligës së Kampionëve.

Arsenali e vlerëson yllin shqiptar rreth 15 milionë euro, por sipas medieve italiane ky transferim mund të zyrtarizohet për një shifër më të ulët.

Tare ka biseduar me Mustafin duke i thënë se e konsiderojnë të rëndësishëm, por shqiptari duhet të ulë pak pagën e tij.

Aktualisht mbrojtësi qendror me pasaportë gjermane fiton pagë të majme prej 4,5 milionë euro në vit te Arsenali, shumë që është e lartë për Lazion.

Në rast se ish-anëtari i Valencias dhe Sampdorias zbret në tre milionë euro, atëherë Lazio ka gati kontratën prej katër viteve për të.

(Foto: S.S. Lazio/Twitter/Facebook)

Nëse realizohet ky transferim, atëherë Mustafi do të bëhej futbollisti i tretë shqiptar që do të jetë te Lazio, pasi aty do të bashkohej me Thomas Strakoshën dhe Vedat Muriqin. /Telegrafi/