Francesco Tahiraj është një nga lojtarët shqiptarë më në formë të momentit.

22-vjeçari nga Vlora është duke kaluar një sezon të mirë, teksa në pjesën e parë luajti me Aluminij në Slloveni dhe në janar kaloi te Hajduk Spliti në Kroaci.

Në total Tahiraj ka luajtur 1884 minuta në të gjitha kompeticionet këtë sezon, ndërsa si sulmues krahu, ai ka shënuar 9 gola dhe ka asistuar 4 të tjerë me të dy ekipet.

Ai luan si sulmues i djathtë, pozicion natyral i tij, por në ekipet ku është aktivuar, ka luajtur herë pas here edhe si sulmues i majtë. Gjithsesi, talenti shqiptar i dalë nga Akademia e Juventusit, ishte një nga lojtarët që priste ftesë nga Christian Panucci për këto eliminatore.

Telesport ka biseduar me lojtarin, duke i marrë atij një prononcim në lidhje me listën e Christian Panuccit. Futbollisti është mirëkuptues për zgjedhjet e trajnerit, ndonëse tregon se ka mbetur disi i surprizuar.

“Besoj se asnjë nuk e priste një listë si kjo e trajnerit Panucci. Por ai është trajner dhe sigurisht zgjedhjet që ka bërë kanë gjithmonë motive që ndoshta ne nuk i dimë”-thotë fillimisht Tahiraj, ndërsa shton:

“Normal që prisja ftesë, por nuk ka vend për demoralizim ose për të mbajtur mëri. Duhet shumë punë ende”-thotë talenti 22-vjeçar.

Arsyet e mosgrumbullimit në kombëtare, Tahiraj i lidh vetëm me mungesën e eksperiencës në ekip kombëtar, ndërsa tregon se tani e tutje do vijojë të punojë më shumë.

“Arsyeja që nuk më ka grumbulluar mund të jetë fakti që kam më pak eksperiencë nga të gjithë të tjerët në rolin tim në kombëtare. Ata kanë qenë pjesë shumë herë në kombëtare”-shprehet Tahiraj, ndërsa vijon:

“Nuk jam aspak i demoralizuar, madje më i fokusuar dhe i uritur. Them se kombëtares nuk duhet t`i tregoj asgjë pasi ata më njohin, thjesht janë zgjedhjet e tyre nëse shkoj ose jo.

Momentalisht jam i fokusuar me Hajdukun ku po punoj për të arritur golin e parë”-tregon sulmuesi i Hajduk Splitit.

Në fund ai bën dhe një prognozë të asaj që pritet të ndodhë me dy ndeshjet e para eliminatore. “Nuk janë ndeshje të thjeshta për mendimin tim. Turqia ka individë të mirë dhe me traditë futbolli.

Edhe Andorra nuk do të jetë e lehtë pasi luajmë jashtë dhe ata do të përqendrohen në mbrojtje. I uroj djemtë që të arrijnë dy fitore”, përfundoi Francesco Tahiraj.