Tahir Lushtaku i kënaqur me fitoren ndaj Llapit, ndeshjen ndaj Malishevës e konsideron vendimtare

Trajneri i Drenicës, Tahir Lushtaku,  është shprehur i kënaqur me fitoren që skuadra e tij e arriti ndaj Llapit.

Në duelin e luajtur në Skenderaj, Drenica triumfoi me rezultatin 1-0, me golin e shënuar nga Besfort Dervishaj në fund të takimit.

“Ka qenë një ndeshje e vështirë duke pasur parasysh se kishim përballë një kundërshtar të fortë me lojtarë cilësor në çdo aspekt. Ne ishim përgatitur të tregoheshim të kujdesshëm dhe kjo u vërejt në pjesën e parë ku gjatë tërë kohës ishim të tërhequr dhe prisnim një gabim të Llapit për ta dënuar”.

“Në pjesën e dytë e kërkuam golin me çdo kusht dhe arritëm të shënojmë dhe të marrim tri pikë shumë të rëndësishme. Edhe pse me vështirësi ne e fituam ndeshjen pasi ky ishte edhe synimi ynë kryesor”.

“Do të mundohemi të punojmë dhe të përgatitemi mirë për ndeshjen me Malishevën që është shumë e rëndësishme si për ne ashtu edhe për ata. Po ashtu, kam besim të plotë në ekipin tim dhe do t’ia dalim të ikim nga zona e barazhit”, ka thënë Lushtaku pas ndeshjes.

Drenica dhe Malisheva mbeten në pozitat shtatë dhe tetë me nga 43 pikë./Telegrafi/