Spektakël futbolli, fërkime, gola e kartonë – ‘el Clasico’ përfundon baras

Camp Nou ka qenë arena e një superndeshjeje ndërmjet Barcelonës dhe Real Madridit që zhvilluan atë që njihet si derbi më i madh në botë – ‘el Clasico’. Dueli ndërmjet dy rivalëve përfundoi baras (2-2).

Vetëm dhjetë minuta lojë mjaftuan që rezultati të zhbllokohej. Dhe kjo erdhi falë një aksioni të shpejtë të katalunasve, me ç’rast Luis Suarez pranoi një asistim nga Sergi Roberto dhe shënoi në portën e Keylor Navas (10′).

Mirëpo, nuk vonoi reagimi i Cristiano Ronaldos. Pas një goditjeje me kokë nga Karim Benzema, portugezi e futi topin në rrjetë (14′). Por, në proces, 33-vjeçari pësoi një lëndim dhe Zinedine Zidane nuk rrezikoi duke e zëvendësuar në pjesën e dytë.

Në vazhdim të pjesës së parë nuk munguan edhe sjelljet agresive të lojtarëve që kulmuan me përjashtimin e Sergi Robertos me karton të kuq për shkak të sjelljes josportive kundrejt Marcelos.

Por, edhe pse kishte inferioritetin numerik në pjesën e dytë, Barca bëri një paraqitje fantastike. Lionel Messi pranoi një top nga Luis Suarez për ta rikthyer epërsinë e vendasve (53′).

Katalunasit patën disa raste të tjera shënimi, por nuk i konkretizuan dhe ndëshkimi erdhi nga Gareth Bale. Një pasim i mirë i dërguar drejt uellsianit nga Marco Asensio rezultoi me golin e barazimit (73′).

Të pandalshme ishin aksionet dhe rastet nga të dyja skuadrat deri në mbyllje të takimit, por asnjëri nga rivalët nuk ia doli ta fitonte ndeshjen.

Barcelona tashmë është kampion i La Ligas për sezonin 2017/2018, ndërsa Real Madridi e ka siguruar pjesëmarrjen në Ligën e Kampionëve për sezonin e ardhshëm.

Për më shumë, Los Blancos luajnë në finalen e garës më të madhe evropiane këtë edicion, derisa Blaugranët e kanë fituar edhe Kupën e Mbretit.

Katalunasit vazhdojnë serinë pa humbje këtë sezon në kampionatin spanjoll, ndërsa në javën e  ardhshme luajnë kundër Levantes. Los Blancos kanë kundërshtar Celta Vigon në javën e 37-të. /Telegrafi/