Si ta kuptoni se kur është koha për të menduar seriozisht ndryshimin e shkollës së fëmijës suaj?

Të shkuarit në shkollë mund të kthehet në një sfidë për fëmijët

Shumë familje e gjejnë veten duke pyetur nëse ndryshimi i shkollës mund të jetë alternativa më e mirë për fëmijën e tyre.

Ky është një vendim i madh dhe që prindërit nuk e marrin lehtë – pak prindër mendojnë se është një ide e mirë të ndryshojnë shkollën e fëmijës së tyre rregullisht.

Ndërsa nuk ka përgjigje bardh e zi rreth kësaj, ka disa pika që mund të ndihmojnë në arsyetim.

Përfshini shkollën aktuale nëse mundeni

Nëse nuk e keni bërë tashmë, kontaktoni shkollën ose mësuesin e fëmijës suaj.

Zgjidhjet më të mira zakonisht arrihen kur prindërit dhe mësuesit mund të punojnë si ekip për të kuptuar dhe ndihmuar fëmijët që janë të pakënaqur ose në vështirësi.

Të kuptuarit pse shkolla duket si një ‘luftë’

Ka shumë aspekte të ndryshme në shkollë. Nxënësit duhet të menaxhojnë punën akademike, ndërveprimet me bashkëmoshatarët, si dhe sjelljen dhe emocionet e tyre në klasë.

Ndoshta janë të hutuar në mësimet e matematikës, ndoshta kanë probleme me miqtë e tyre ose ndoshta fëmija juaj po përjeton bullizëm. Shpesh do të jetë një kombinim faktorësh.

Një faktor tjetër i rëndësishëm për t’u marrë parasysh është “përshtatshmëria” midis fuqive dhe aftësive të fëmijës suaj dhe shkollës që po ndjek.

Ndoshta e keni për zemër që fëmija juaj të ndjekë një shkollë të caktuar (ndoshta një shkollë që ka një reputacion për përsosmëri akademike ose sportive). Por mendoni a është e duhura për fëmijën tuaj?

A do të shërbejë ndryshimi i shkollës?

Pasi të ndiheni sikur i kuptoni sfidat e fëmijës tuaj në shkollë, është e rëndësishme të pyesni veten: “sa gjasa ka që situata e tyre specifike të përmirësohet duke ndryshuar shkollën?”

Mbani parasysh gjithashtu mesazhin që mund t’i komunikoni pa dashje fëmijës tuaj duke ndryshuar shkollën.

Një fillim i ri

Ndonjëherë, pavarësisht nga synimet dhe përpjekjet më të mira të secilit, mund të vijë një moment ku është koha për të pranuar se një situatë sfiduese në shkollë nuk po ndryshon. Dhe, shëndeti dhe mirëqenia mendore e një fëmije po ndikohet negativisht. Nëse është kështu, një fillim i ri në një shkollë të re mund të jetë alternativa më e mirë. /Telegrafi/