Shpërthimi i vullkanit më të madh aktiv në botë, lava e zjarrtë ‘spërkat’ deri në 60 metra lartësi – paralajmërime se mund të ndodhë ‘më e keqja’

Lava e zjarrtë dhe hiri ende po shpërndahen në lartësi deri në 60 metra në ajër nga Mauna Loa e Havait pasi vullkani më i madh aktiv në botë shpërtheu për herë të parë në 38 vjet.

Sipas mediave të huaja, përcjell Telegrafi, zyrtarët kanë paralajmëruar 200,000 banorët e Big Island që të përgatiten për një skenar të rastit më të keq edhe pse rrjedha e lavës nuk po rrezikon ende qytetet, duke thënë se një shpërthim mund të jetë ‘shumë dinamik dhe vendndodhja dhe përparimi i rrjedhave të lavës mund të ndryshojë me shpejtësi’.

Lava përfundimisht mund të arrijë në lagjet e banuara, ndërsa rrjedh tatëpjetë, megjithëse mund të duhet një javë ose më shumë që shkëmbi i shkrirë të arrijë në zonat e populluara.

Mauna Loa është duke nxjerrë gazra vullkanikë të cilët formojnë tymin vullkanik, kur përzihen me avujt, oksigjenin dhe pluhurin në rrezet e diellit.

Si rezultat, zyrtarët shtetërorë të shëndetësisë po u bëjnë thirrje njerëzve të reduktojnë ushtrimet në natyrë dhe aktivitetet e tjera që shkaktojnë frymëmarrje të rënduar.

Shpërthimi filloi në majën e Mauna Loa rreth orës 23:30 të së dielës, por filloi të vërshonte herët në mëngjesin e së hënës – megjithëse ekspertët thonë se ai mbetet i kufizuar në zonën e çarjes verilindore, larg qytetit të Hilo.

Zyrtarët i kërkuan publikut që të qëndrojë larg kraterit përgjatë krahut verilindor të vullkanit, duke pasur parasysh rreziqet që paraqet llava, e cila po “hidhet” rreth 60 metra në ajër nga tri çarje të veçanta që vlerësohen afërsisht të jenë deri në 3 kilometra të gjata. /Telegrafi/