Shkaku i problemeve teknike anulohen tri fluturime në Aeroportin e Prishtinës, situata rikthehet në normalitet

Aeroporti Ndërkombëtar i Prishtinës ka pasur probleme me fluturime për shkak se në pajisjet e navigimit është futur uji si pasoj e reshjeve të shiut.

Zëdhënësi i Agjencisë së Shërbimeve të Navigacionit Ajror (ASHNA), Driton Ujkani, për Telegrafin ka thënë se për fat të mirë defektet teknike janë evituar dhe fluturimet janë rikthyer.

“Janë anuluar vetëm tri fluturime gjithsejtë, për të cilat do vendosin kompanitë respektive nëse do të realizohen më vonë apo jo. Defekti teknik është rregulluar dhe tashmë është kthyer normaliteti”, ka deklaruar Ujkani.

“Agjencia e Shërbimeve të Navigacionit Ajror (ASHNA), njofton se sot gjatë ditës, për shkak të vërshimeve nga të reshurat e shiut, një nga pajisjet e navigimit (DVOR/DME) ka dalë nga funksioni si pasoj e depërtimit të ujit në këtë pajisje. Pas intervenimit nga ana e ekipeve të Departamentit Teknik në ASHNA, pajisja në fjalë është kthyer ne funksion rreth orës 19:00.
Për shkak të mosfunksionimit të kësaj pajisje operimet në ASHNA kanë qenë të suspenduara gjatë një pjese të ditës, ndërkaq nga ora 19:00 operimet kanë filluar të realizohen sipas orarit të planifikuar”, thuhet në njoftimin e ASHNA.

Ndryshe, reshjet e shiut gjatë dy ditëve të fundit kanë shkaktuar probleme të mëdha në trafikun rrugor në Kosovë.

Shumë fshatra e lagje janë përmbytur, derisa vetura të shumta janë dëmtuar nga vërshimet masive.

Dëmet materiale llogaritet të jenë të mëdha derisa nga komunat është premtuar kompensim./Telegrafi/