Roma e ka nisur mbarë këtë edicioni të Ligës së Evropës.

Giallorosët kanë triumfuar me rezultat të thellë 4-0 ndaj ekipit turk Istanbul Basaksehir.

Për ta parë tifozët golin e parë në këtë takim u desh të presin deri në minutën e 41-të, kur pas një harkimi nga Spinazzola topin në rrjetë gabimisht e dërgoi mbrojtësi i turqve Junior Caicara.

Me epërsinë minimale të Romës 1-0 përfunduan 45 minutat e para të kësaj sfide.

AS Roma (Photo by Paolo Bruno/Getty Images)

Në pjesën e dytë shpërtheu sulmi i Romës që shënuan edhe tre gola të tjerë.

Fillimisht Edin Dzeko realizoi për 2-0 pas një asistimi të mrekullueshëm nga Nicolo Zaniolo.

Ishte talenti italian Zaniolo që në minutën e 71-të shënoi golin e tretë për Romën.

Krejt në fund të ndeshjes radha për të shënuar i erdhi edhe talentit holandez Justin Kluivert.

AS Roma. (Photo by Paolo Bruno/Getty Images)

Kësisoj Giallorosët e nisën mbarë aventurën në Ligën e Evropës ku janë ndër ekipet favorite për ta fituar këtë garë.

Ndeshja tjetër e grupit J mes Borussia Moenchegladbach dhe Wolfsberger përfundoi me fitoren e thellë të mysafirëve 0-4. /Telegrafi/