Rezerva Federale rrit normën e interesit

Rezerva Federale rriti normën bazë të interesit me gjysmë pikë përqindjeje që është më e madhja në 22 vite.

Banka Qendrore e SHBA-së caktoi normën e synuar të fondeve federale në një interval midis 0.75 për qind dhe 1 për qind me një vendim unanim, i cili mund të pasohet nga një rritje e mëtejshme e kostove të huamarrjes me përmasa që mund të jenë të ngjashme.

“Pavarësisht rënies së Prodhimit të Brendshëm Bruto gjatë tre muajve të parë të këtij viti, shpenzimet e konsumatorëve familjarë dhe investimet fikse të bizneseve vazhdojnë të mbeten në nivele të larta. Rikthimet në vendet e punës kanë qenë po ashtu në nivele të mëdha”, tha për rritjen e normës së interesit Komiteti Federal i Tregut të Hapur.

Inflacioni “mbetet i lartë”, me luftën në Ukrainë dhe izolimet e reja të shkaktuara nga pandemia e COVID-19 në Kinë që kërcënojnë të ushtrojnë presionin të lartë.

Në këtë deklaratë u tha se bilanci i obligacioneve të FED, i cili u rrit në rreth 9 trilionë dollarë teksa Banka Qendrore po përpiqej të ndihmonte ekonominë si rrjedhojë e pasojave të COVID-19, do të lejohet të bjerë me 47.5 miliardë dollarë ҫdo muaj në qershor, korrik dhe gusht. Ky reduktim do të shkojë deri në 95 miliardë dollarë në muaj duke filluar nga shtatori.

Politikëbërësit nuk dhanë projeksione të reja ekonomike pas takimit të kësaj jave, por të dhënat që nga mbledhja e tyre e fundit në mars nuk tregojnë shenjat e ndonjë ngadalësimi të inflacionit, të rritjes së pagave apo të ritmit të shpejtë të punësimeve.

Tregjet e aksioneve në SHBA pësuan një rritje pas këtij njoftimi, ndërsa yield-et e obligacioneve të qeverisë nuk patën ndonjë ndryshim të madh. Dollari u dobësua në përmasa modeste kundrejt një shporte valutash të partnerëve kryesorë tregtarë. /Telegrafi/