Real Madridi ka fituar me rezultat 3-1 në udhëtim te Celta Vigo në ndeshjen e vlefshme për javën e 28-të në La Liga.

Los Blancos kanë vazhduar me rezultate pozitive në kampionat duke marrë fitoren e radhës dhe duke u ngjitur përkohësisht në pozitën e dytë para Barcelonës.

Pjesa e parë e ndeshjes u karakterizua me lojë më të mirë të mysafirëve, të cilët arritën t’i shënojnë edhe dy gola, kundrejt një të vendasve.

Goli i parë i ndeshjes erdhi në minutën e 20-të me anë të Karim Benzema, i cili shënoi për 0-1, ndërsa francezi u përkujdes të shënojë edhe në minutën e 30-të për 0-2.

Vendasit arritën të kthehen në lojë në minutën e 40-të duke shënuar me anë të Santi Mina për 1-2 dhe me këtë rezultat skuadrat shkuan në pushim.

Pjesa e dytë e ndeshjes u karakterizua me lojë thuajse të barabartë, me vendasit që patën diçka më shumë nga loja, por Reali e menaxhoi mirë ndeshjen.

Megjithatë, portat mbeten të paprekura deri në minutat shtesë të ndeshjes dhe ishin përsëri mysafirët që shënuan.

Ishte Marco Asensio, i cili shënoi për 3-1 pas asistimit të Benzemës dhe vulosi rezultatin përfundimtar të ndeshjes.

Pas kësaj fitore, Reali e sheh veten në pozitën e dytë me 60 pikë apo tri më pak se Atletico Madridi i pari me një ndeshje më pak, ndërsa Celta zë vendin e 11-të me 34 pikë.

Në ndeshjen e radhës, Mbretërit luajnë në shtëpi ndaj Eibarit, ndërsa Celta udhëton te Deportivo Alavesi. /Telegrafi/