Fansat e legjendës së muzikës, Prince, janë mahnitur kur në YouTube është publikuar një këngë e padëgjuar e këngëtarit të ndjerë.

Kjo këngë është lansuar me rastin e 40-vjetorit të albumit të dytë të muzikantit që është titulluar thjesht “Prince”.

Demoja akustike e këngës “I Feel For You” është publikuar në të gjitha platformat ‘streaming’ duke përfshirë edhe shërbimin më të popullarizuar të shpërndarjes së videove.

Prince (Foto: Kevin Winter/Getty Images/Guliver)

Incizimi është bërë në fund të vitit 1978, gjatë kohës kur Prince po përgatitje për debutimin solo në teatrin Capri në veri të Minneapolisit.

Versioni i përpunuar i kësaj kënge ishte pjesë e albumit të dytë të këngëtari që u publikua në tetor të vitit 1979, ndërsa u përpunua nga Chaka Khan në vitin 1984 duke zënë edhe vendin e dhjetë në ‘Billboard Hot 100’ dhe madje ky version i fitoi dy çmime Grammy.

Prince ndërroi jetë në prill të vitit 2016 si pasojë e mbidozimit me opioidin fentanil. /Telegrafi/