Problemet shëndetësore ia pamundësojnë Phil Collinsit që të luajë në bateri

Muzikanti britanik, Phil Collins, ka rrëfyer se si përkeqësimi i shëndetit ka ndikuar në aftësitë e tij për të performuar nëpër koncerte.

“Jam paksa i sfiduar fizikisht, gjë që është shumë frustruese, sepse do të më pëlqente që të luaja atje (në skenë)”, ka thënë Collins për BBC duke diskutuar lidhur me turneun rikthyes të grupit të tij “Genesis”.

Kur është pyetur se a është në gjendje akoma të luajë në bateri, 70-vjeçari është shprehur: “Mezi arrij ta mbaj një shkop (të baterive) me këtë dorë, prandaj janë disa gjëra fizike që më pengojnë”.

View this post on Instagram

A post shared by Phil Collins (@officialphilcollins)

Më pas, Collins deklaroi se kishte besuar se ribashkimi i përmendur do të ishte i fundit për të në rrugë dhe në koncerte.

“Të gjithë jemi burra të të njëjtës moshë dhe mendoj se në një moment të caktuar duhet t’i japim fund. Mendoj, po, mendoj përgjithësisht për veten, nuk di nëse dua të shkoj më në turne”, ka theksuar muzikanti.

Collins, i cili njihet për stilin e veçantë të luajtjes në bateri dhe konsiderohet ndër muzikantët me më së shumti ndikim në gjeneratën e tij, ka pësuar një seri lëndimesh fizike përgjatë karrierës.

Para disa vitesh, i është nënshtruar ndërhyrjes kirurgjike në shpinë, ndërsa ka problem nervor në krahun e majtë, si dhe ka pësuar fraktura të shumta në këmbë dhe në vitin 2017 e kishte lënduar kokën pas rrëzimit në Royal Albert Hall në Londër. /Telegrafi/