Policia e Maqedonisë parandalon trafikimin e 20 refugjatëve

Në dy raste të veçanta, policia e Maqedonisë ka parandaluar tentativën për trafikimin e gjithsej 20 refugjatëve nëpërmjet kufinjve të Maqedonisë. Njëri rast është regjistruar në fshatin Miletkovë të Gjevgjelisë, ndërsa rasti tjetër në vendkalimin kufitar në Dojran të Vjetër.

Ekipi policor nga Stacioni policor për kalim kufitar dhe mbikëqyrje kufitare “Bogorodica” ka ndalur furgon “Fiat Ducato” me targa të Bullgarisë, i drejtuar nga 28 vjeçari nga Strumica. Gjatë kontrollit, në automjet policia ka zbuluar 15 refugjatë, prej të cilëve 8 nga Siria, 5 nga Pakistani dhe 2 nga Iraku. Refugjatët janv mbajtur në stacionin policor, ndërsa vozitësi është arrestuar.

Në rastin e dytë janë zbuluar 5 refugjatë. Rasti është regjistruar dje në mëngjes në hyrjen për në Maqedoni, vendkalimi te Dojrani i Vjetër, ku automjeti ngarkues është ndaluar për shkak të dyshimit të mbingarkesës. Në të janë zbuluar 5 persona, nga të cilët, dy të rritur dhe tre persona të moshës 12, 14 dhe 16 vjeçare, prej të cilëve katër nga Afganistani dhe një nga Bangladeshi./Telegrafi/