Daniel Craig ka luajtur në filma të ndryshëm gjatë karrierës, mirëpo më së shumti do të mbahet mend për rolin e James Bondit. Aktori është paraqitur në katër filma për agjentin sekret, ndërsa filmi i pestë në këtë rol, “No Time to Die”, do të vijë në vitin e ardhshëm.

Ndërsa falë portretizimit të ‘007’, 51-vjeçari ka fituar shuma të majme parash. Filmi i parë, në të cilin e luajti Bondin, “Casino Royale”, është lansuar në vitin 2006 duke sjellë përfitime prej afro 600 milionë dollarësh dhe njëherësh shënoi suksesin më të madh të një filmi për agjentin sekret kur është fjala për përfitimet.

“Quantum of Solace” grumbulloi përfitime prej 586 milionë dollarësh përfitime, ndërsa rekordi i “Casino Royale” qëndroi vetëm deri në vitin 2012, pasi që “Skyfall” (vazhdimi i tretë me Craigun në rolin kryesor) kaloi shifrën prej një miliard dollarësh përfitime.

Në këtë mënyrë, u rrit dukshëm edhe pasuria e aktorit, i cili në vitin 2015 ishte në listën e Forbes për aktorët më të paguar, duke qenë se për filmin e radhës, “Spectre” (që fitoi në total 881 milionë dollarë), ylli anglez u pagua 27 milionë dollarë.

Mens Health raporton se në vitin 2016, Craig kishte marrë ofertë prej 150 milionë dollarësh që t’i xhironte edhe dy filma të tjerë për Bondin, por ai ka pranuar që të luajë vetëm në një, pikërisht në projektin e radhës, “No Time to Die”, për të cilin nuk dihet se sa do të paguhet saktësisht.

Ndërsa, sipas Celebrity Net Worth, aktualisht pasuria e përgjithshme e Daniel Craig llogaritet rreth 130 milionë dollarë (118 milionë euro). /Telegrafi/