Legjenda e muzikës rok, Ozzy Osbourne, i ka shokuar fansat e tij me lajmin se është diagnostikuar me sëmundjen Parkinson, një çrregullim degjenerativ i sistemit nervor.

Reklama

Këngëtari u detyrua të anulonte disa koncerte gjatë vitit 2019 për shkak të problemeve shëndetësore, ndërsa tash është mësuar sëmundja e tij.

“Ka qenë një sfidë e rëndë për të gjithë ne. Performancën e fundit e pata për Vitin e Ri. Atëherë u rrëzova keq. E operova qafën, mi kanë prerë nervat gjatë ndërhyrjes kirurgjike”, ka treguar Ozzy për Good Morning America.

Sëmundja Parkinson është një çrregullim progresiv i sistemit nervor që e prek lëvizjen. Simptomat fillojnë gradualisht, nganjëherë duke nisur me tremor (dridhje) vetëm në njërën dorë që vërehet me vështirësi.

Krahas tremorëve, shkakton edhe ngurtësi ose lëvizje të ngadalta. Në stadet e hershme, fytyra mund të tregojë pak ose aspak mimikë. Krahët mund të mos lëkunden gjatë ecjes, të folurit bëhet i butë ose i paqartë.

Simptomat përkeqësohen me përparimin e sëmundjes. Sëmundja Parkinson nuk ka shërim, mirëpo ka terapi që dukshëm e përmirësojnë gjendjen. Në raste të caktuara, është e nevojshme ndërhyrja kirurgjike në tru.

Bashkëshortja e tij, Sharon, ka thënë se Osbourne është diagnostikuar me tipin 2 të sëmundjes Parkinson.

Reklama

“Ekzistojnë tipa të ndryshëm të sëmundjes Parkinson, edhe pse nuk janë vdekjeprurëse, ato veprojnë në nerva të caktuar në trupin tuaj. Është sikur të keni një ditë shumë të mirë dhe pastaj një ditë shumë të keqe”, ka deklaruar gruaja e rokerit.

Reklama

Ozzy është diagnostikuar me sëmundjen Parkinson që nga shkurti i vitit të kaluar. Aktualisht është duke marrë terapi kundër sëmundjes dhe terapi për nervat. /Telegrafi/