Nga Ronaldinho dhe Neymar te Iniesta, Mbappe dhe shumë yje tjerë – reagimet për fitimin e Topit të Artë nga Messi

Shumë emra të njohur legjendash, por edhe yjesh aktualë të futbollit kanë reaguar pas fitimit të Topit të Artë nga Lionel Messi, të hënën mbrëma në ceremoninë e organizuar nga France Football në Paris.

Lionel Messi, Aitana Bonmati, Emiliano Martinez dhe Jude Bellingham ishin fituesit e mëdhenj të ceremonisë së 67-të të Topit të Artë që u zhvillua të hënën në mbrëmje në “Theatre du Chatelet” në Paris.

Megjithatë, fituesi më i madh padyshim ishte ylli argjentinas, Messi, i cili fitoi Topin e Artë të tetë në histori, duke vazhduar të lë trashëgimi në çmimin më të madh individual në botën e futbollit.

Pasi Messi mori trofeun e madh individual, shumë ish-bashkëlojtarë të tij nga koha e Barcelonës dhe Paris Saint-Germain reaguan duke e uruar.

Më poshtë janë disa nga reagimet më të mira për fitimin e Topit të Artë të Leo Messit nga superyjet e futbollit.

“Urime edhe një here Leo, më i miri në botë!!! Shumë i lumtur për ty vëllai im.. Një përqafim i madh”, ka shkruar Ronaldinho.

“I paepur!”, ka shkruar Andres Iniesta, ndërsa Luis Suarez ishte më fjalë shumë, duke shkruar: “Çmim i merituar mik, fjalët nuk mjaftojnë për të përshkruar historinë që ke shënuar dhe do të vazhdojë të shënojë në futbollin botëror”.

Dy ish-bashkëlojtarët te Barcelona dhe bashkëlojtarët aktual te Inter Miami, Sergio Busquets dhe Jordi Alba, nuk kishin si të mungojnë me urimet e tyre.

“Urime! Krenar për ty dhe gjithçka që ke arritur vit pas viti”, ka shkruar Busquets, ndërsa  Alba ka shtuar: “Sa i mrekullueshëm që je, Leo!! Urime për këtë Top të Artë të ri!! Je më i miri”.

Urime për Messin pati edhe nga Neymar, me të cilin luajti te Barcelona dhe PSG, por edhe nga Kylian Mbappe.

Neymar ka shkruar “Urime Leo, je më i miri”, ndërsa Kylian Mbappe e uroi gjithashtu duke postuar: “Urime Leo për çmimin tuaj. Ju e meritoni atë”. /Telegrafi/